नेपालबाट मनसुन बाहिरिने क्रम सुरुः महाशाखा

google

२३ असोज, हेटौंडा । नेपालको पश्चिमी क्षेत्रबाट यसबर्षको मनसुन बाहिरिने क्रम सुरु भएको मौसम पूर्वानुमान महाशाखाले जनाएको छ । सुदूरपश्चिम प्रदेश र कर्णाली प्रदेशका सबै भूभाग तथा लुम्बिनी प्रदेशको पश्चिमी भूभागबाट मनसुन बाहिरिएको महाशाखाले जनाएको छ ।
महाशाखाका मौसमविद् गंगा नगरकोटीका अनुसार अरु भूभागबाट पनि केही दिनभित्र मनसुन बाहिरिनेछ । यो वर्षदेखि मनसुनको बहिर्गमनऔसत मिति अक्टोबर २ भनिएको छ । निर्धारित मितिभन्दा ६ दिन ढिलो मनसुन बाहिरिन सुरु गरेको हो । गत जुन १३ अर्थात जेठ ३० गते मनसुन नेपाल प्रवेश गरेको थियो ।
सामान्यतया नेपालमा पूर्वी भूभागबाट प्रवेश गर्ने मनसुन मध्य क्षेत्र हुँदै पश्चिमसम्म फैलिन्छ । झण्डै चार महिनासम्म रहने मनसुन पश्चिमबाट मध्य क्षेत्र हुँदै पूर्वबाट नै बाहिरिन्छ । यो वर्षको मनसुनजन्य घटनामा परेर १ सय ३६ जनाको मृत्यु भएको छ भने ४५ जना बेपत्ता हुँदा १ सय ४४ जना घाइते भएका विपत् जोखिम न्यूनिकरण तथा व्यवस्थापन केन्द्रले जनाएको छ । 
यसैबीच नेपालबाट मनसुन बाहिरिन सुरु भएसँगै तत्काल पानी पर्ने कुनै प्रणाली सक्रिय नभएकाले अबको केही दिन ठूलो पानी कतै पनि नपर्ने मौसमविद्ले बताएका छन् ।