भलिबलमा ४ टिम विजयी

३१ भदौ, हेटौँडा । हेटौँडाको बस्तिपुरमा जारी केशवलाल श्रेष्ठ स्मृति राष्ट्रिय पुरुष भलिबल प्रतियोगितामा शनिबार नेपाल आर्मी, पूर्वाञ्चल टिम, पश्चिमाञ्चल र आयोजक विजयी भएको छ ।
पहिलो खेलमा नेपाल आर्मीको टिम सोझो सेटमा विजयी भएको छ । बलियो प्रतिद्वन्द्वी मानिएको नेपाल पुलिस क्बललाई २५–१७, २५–१४ र २५–१५ को सेटमा पराजित गर्दै नेपाल आर्मीले सहज जित आत्मसात गरेको हो । दोस्रो खेलमा पूर्वाञ्चल विकास क्षेत्रको टिमले सुदूरपश्चिमाञ्चल विकास क्षेत्रको टिमलाई सोझो सेटमा पराजित गरेको छ । पूर्वाञ्चलले सुदूरपश्चिमाञ्चललाई २५–२१, २५–१६ र २५–१५ को सेटमा पराजित गरेको हो । तेस्र्रो खेलमा पश्चिमाञ्चल विकास क्षेत्रको टिम र शिपा पोखरे युवा सञ्जाल सिन्धुपाल्चोकबीच खेल भएको छ । खेलमा पश्चिमाञ्चलले सिपा पोखरेलेलाई पश्चिमञ्चलले २५–१३, २५–१५ र २५–१२ को सोझो सेटमा हराएको छ ।
शनिबार नै भएको पहिलो क्वार्टर फाइनल खेलमा आयोजक टिमले पूर्वाञ्चल विकास क्षेत्रको टिमलाई सोझो सेटमै पराजित गर्दै सेमीफाइनल प्रवेश गरेको छ । आयोजक टिमले पूर्वाञ्चल विकास क्षेत्रको टिमलाई २५–२१, २५–२२ र ३२–३० को सेटमा पराजित गरेको हो । 
आइतबार क्वाटरफाइनल चरणका तीनवटा खेल हुने प्रतियोगिताका संयोजक राजेश भेटवालले जानकारी दिए । केशवलाल श्रेष्ठ स्मृति केन्द्रीय प्रतिष्ठान र युवा तथा खेलकुद समन्वय समिति बस्तीपुरको संयुक्त आयोजनामा भएको खेलमा ८ टिमको सहभागिता रहेको छ । प्रतियोगिताको उपाधी विजेताले २ लाख र उपविजेताले १ लाख रुपैयाँ पाउनेछ ।