स्थानीय तहको तेस्रो चरणको मतदान सुरु 

२ असोज, हेटौँडा । २ नम्बर प्रदेशको ८ जिल्लाका एक महानगरपालिका, तीन उपमहानगरपालिका, ७३ नगरपालिका र ५९ गाउँपालिकामा विभिन्न पदका लागि अहिले ७ बजेबाट बेलुका ५ बजे सम्म मतदान हुँदै छ । आज हुने चुनावमा २ नम्बर प्रदेशका २६ लाख ६४ हजार ९५० मतदाताले मताधिकारको प्रयोग गर्दैछन् ।
यस चुनावबाट छ हजार ६२७ प्रतिनिधि निर्वाचित हुनेछन् भने निर्वाचनको मैदानमा कुल ३७ हजार २३६ उम्मेदवार प्रतिस्पर्धामा छन् । यस चुनावमा आठजना उम्मेदवार निर्विरोध निर्वाचित भइसकेको निर्वाचन आयोगले जानकारी दिएको छ । निर्वाचन प्रकृयामा नगरप्रमुख तथा अध्यक्षमा एक हजार ७०९ जना पुरुष र ६१ महिलाले प्रतिस्पर्धामा छन् भने उपप्रमुख र उपाध्यक्षमा १९७ पुरुष र ९१९ महिला चुनावी मैदामा छन् । वडाध्यक्षमा आठ हजार ५२ पुरुष र २२३ महिला उम्मेदवारले भाग लिइरहेका छन् । 
आयोगले अपांगता भएका, गर्भवती, सुत्केरी, ज्येष्ठ नागरिक, अशक्त वा बिरामी मतदातालाई मतदान गर्ने कार्यमा प्राथमिकता दिई उचित व्यवस्था मिलाउन र सहज ढंगले मतदानको प्रबन्ध मिलाउन मुख्य निर्वाचन अधिकृत र मतदान अधिकृतहरुलाई निर्देशन दिएको छ । दृष्टिविहीन वा शारीरिक अशक्तता भएका मतदाताले आफै मत संकेत गर्न नसकेमा एकाघरको परिवारका सदस्यले मतदान अधिकृतको स्वीकृति लिएर वा मतदान अधिकृतको सहयोगमा मतसंकेत गराउन आयोगले सुझाव दिएको छ ।