मानवसेवा आश्रमद्वारा अहिलेसम्म ६२७५ लाई सेवा प्रदान

१५ मंसिर, हेटौंडा । भिन्न कारणले सडकमा कष्टपूर्ण जीवन बिताउन बाध्य रहेकाहरुको उद्दार, संरक्षण एवम् पालनपोषण गर्दै आएको मानवसेवा आश्रम संस्थाले हालसम्म ६ हजार २७५ जनालाई सेवा दिएको छ । 
२०६९ सालमा हेटौंडामा स्थापना भएको यस संस्थाले ७ वटा प्रदेशको १७ जिल्लामा रहेको २३ वटा सेवा केन्द्र मार्फत ६ हजार २७५ जनाको उद्दार गरेको हो । जसमध्ये २ हजार ४२५ जनालाई परिवारमा पुनर्मिलन गराएको छ भने १ हजार ६६७ जना उपचार पश्चात स्वेच्छाले आश्रम छोडेर गएका छन् । 
आश्रमको संरक्षणमा रहेकै अवस्थामा ६३४ जनाको मृत्यु हुँदा ३५४ जनालाई सामुदायिक पुनस्र्थापना गरिएको आश्रमका अध्यक्ष रामजी अधिकारीले जानकारी दिए । उनका अनुसार देशभरको आश्रममा एकहजार ५६७ जना आश्रित रहेका छन् । 
हेटौंडा–५ को अब्बलडाँडाबाट घर भाडामा लिएर सेवा सुरु गरेको आश्रमको अहिले लामसुरेधापमा सुविधासम्पन्न भवन निर्माण समेत भैसकेको छ । डेढ बर्षभित्र आश्रमको शाखा रहेको १७ वटै जिल्लामा भवन निर्माण गर्ने, वि.सं २०८१ भित्र कम्तिमा ५० करोडको अक्षयकोष स्थापना गर्ने र २०८२ बैशाख १ गते नेपाललाई सहयोगापेक्षी मानवमुक्त मुलुक घोषणा गर्ने योजना रहेको अधिकारीले जानकारी दिए ।