राप्रपाको एकता महाधिवेशन आजदेखि काठमाडौंमा सुरू हुँदै 

१५ मंसिर, हेटौंडा । राष्ट्रिय प्रजातन्त्र पार्टी (राप्रपा)को महाधिवेशन आजदेखि काठमाडौंमा सुरू हुँदैछ । कमल थापा नेतृत्वको राप्रपा, पशुपति शम्शेर जबरा र डाक्टर प्रकाशचन्द्र लोहनीको नेतृत्वको राप्रपा विचमा संयुक्त एकता भएपछि पहिलो पटक राप्रपाको एकता महाधिवेश हुन लागेको हो । 
काठ्माडौँ भृकुटिमण्डपमा हुने महाधिवेशनमा भाग लिन देशभरबाट ४ हजार ३ सय ८५ प्रतिनिधि सहभागी हुने राप्रपाका प्रचार संयोजक मोहन श्रेष्ठले जानकारी दिए । महाधिवेशनबाट यस पटक अध्यक्षमा कमल थापा र राजेन्द्र लिङ्देनले आकंक्षा देखाएका छन् । 
लिङ्देन र थापा दुबै जनाले अध्यष पदमा आफ्नो उम्मेद्वारी रहने घोषणा गरिसकेका छन् । अध्यक्ष पदमा उम्मेदवारी घोषणा गरेका लिङ्देनलाई डाक्टर प्रकाशचन्द्र लोहनी र पशुपति शम्सेर जबराले समर्थन् गरेका छन् ।  
राप्रपाको संशोधित विधानअनुसार केन्द्रीय समिति १ सय ९९ सदस्यीय हुने व्यवस्था छ । १ सय ९९ जनाको कार्यसमितिमा १ सय ४९ निर्वाचनबाटै चुनिने छन् । तर, आजबाट तीन दिनसम्म चल्ने महाधिवेशनमार्फत भने राप्रपाले १ सय ४९ जनालाई मात्रै निर्वाचनमार्फत केन्द्रीय समितिमा चयन गर्नेछ ।
 राप्रपा विधानमा ७५ प्रतिशत पदाधिकारी निर्वाचनबाट चुनिनेगरी विधान संशोधन गरिएको हो । राप्रपा विधानमा केन्द्रीय समितिमा अध्यक्ष, ६ जना उपाध्यक्ष, ६ महामन्त्री, एक जना कोषाध्यक्ष, प्रवक्ताहरू, सात जना सहमहामन्त्री, सात जना सहायक महामन्त्री र एक जना सहायक कोषाध्यक्षसहित १ सय ९९ सदस्यीय कार्यसमिति हुने उल्लेख छ ।