नयाँ र पुराना पुस्ताका विचार र अनुभवलाई संयोजन गर्न मेरो उम्मेदावारीः डीना

२६ मंसिर, हेटौंडा । पछिल्लो समय मकवानपुर जिल्लामा नेपाली कांग्रेस बलियो सांगठनिक संरचना निर्माण गरेर अगाडि बढिरहेको छ । पछिल्लो समय कांग्रेसको केन्द्रमा महालक्ष्मी उपाध्याय ‘डीना’ र जिल्लामा युवा नेता इन्द्रबहादुर बानियाँले संगठनको नेतृत्व गरिरहेका छन् । 
पछिल्लो समय देशमा रहेका कम्युनिष्ट पार्टीमा देखिएको विभाजनले नजिकिँदै गरेको निर्वाचनमा कांग्रेस पहिलो पार्टी हुने अड्कल राजनीति वृत्तमा भइरहेको छ । स्थानीय तह, प्रदेश र प्रतिनिधिसभाको निर्वाचन नजिकिँदै गरेको अवस्थामा नेपाली कांग्रेस मकवानपुरकी नेतृ ‘डीना’ले काठमाडौंमा जारी १४ महाधिवेशनमा सहमहामन्त्रीमा उम्मेदवारी दिएकी छिन् । कांग्रेस मकवानपुरको इतिहासमा पदाधिकारीमा उम्मेदवारी दिने उनी नै पहिलो मकवानपुरे नेतृ हुन् ।
२०६३ सालदेखि कांग्रेस केन्द्रीय सदस्यमा रहेका काम गर्दैै आएकी डीनाले यस पटक महिलातर्फ सहमहामन्त्रीमा उम्मेदवारी दिएकी हुन् । २०५९ सालमा  राष्ट्रिय महिला आयोग सदस्य र २०६४ सालमा जलस्रोत राज्यमन्त्री बनेकी डीनाले आफ्नो अनुभवलाई पार्टीको संगठन विस्तारमा प्रयोग गर्ने बताइन् ।
नेपाली कांग्रेस र नेपाल विद्यार्थी संघद्वारा प्रजातन्त्र पुनस्र्थापनाका लागि भएको २०३६ सालको विद्यार्थी आन्दोलन, २०४२ सालको सत्याग्रह, २०४६ सालको जनआन्दोलन र २०६२÷०६३ सालको लोकतान्त्रिक आन्दोलनमा पटक÷पटक जेल जीवन विताएकी थिइन् । उनी ०४२ सालको सत्याग्रहमा शैलजा आचार्यस“ग जेल परेकी डीना पहिलो र दोस्रो संविधानसभाका सदस्य बनिन् । उनी २०४३ सालमा पद्मकन्या क्याम्पस स्ववियु सभापति निर्वाचित भएकी थिइन् ।  
‘कांग्रेसलाई समावेशीताको आँगन बनाउँदै सवै जाति, भाषा, धर्म र वर्ग अटाउँदै विकास, रोजगार र आर्थिक उन्नतिका लागि मैले उम्मेदावरी दिन लागेको हुँ ।’, उनले कांग्रेसप्रति युवाहरुको आकर्षण बढाउन र समुन्नत नेपाल निर्माण गर्नु आफ्नो मुख्य लक्ष्य रहेको बताइन् । वर्तमान कांग्रेस सभापति तथा  प्रधानमन्त्री शेरबहादुर देउवा प्यानलबाट उम्मेदावरी दर्ता गराएकी डीनाले आफू निर्वाचित भएपश्चात् पार्टी र राज्यको हरेक अङ्गमा महिलाका अधिकार स्थापित गर्न, नयाँ र पुराना पुस्ताका विचार र अनुभवलाई संयोजन गर्दै अगाडि बढ्ने बताइन्  ।