कांग्रेस महाधिवेशनः एक सभापतिसहित ६० ले गरे उम्मेदवारी फिर्ता

२६ मंसिर, काठमाडौं । नेपाली कांग्रेसको १४ औँ महाधिवेशनमा उम्मेदवारी दिएकामध्ये एक सभापतिसहित ६० जनाले आफ्नो मनोनयन फिर्ता लिएका छन्।

कांग्रेस केन्द्रीय निर्वाचन समितिका अनुसार एक सभापति, एक सहमहामन्त्री र ५८ जना केन्द्रीय सदस्यले उम्मेदवारी फिर्ता लिएका हुन् । कांग्रेस सभापतिको दौडबाड गोर्खाका युवराज न्यौपानेले उम्मेदवारी फिर्ता लिएका छन् । त्यस्तै सहमहामन्त्रीको उम्मेदवारी दिएका सुरेन्द्रप्रसाद चौधरीले पनि आफ्नो नाम फिर्ता लिएका छन् ।
केन्द्रीय सदस्यमा उम्मेदवारी दिनेहरुमध्ये मीन विश्वकर्मा, जगीलाल यादवलगायत ५८ जनाले आफ्नो मनोनयन फिर्ता लिएको निर्वाचन समितिका सचिव जगन्नाथ श्रेष्ठले जानकारी दिए ।
कांग्रेस महाधिवेशनमा अझै ४८८ जनाको उम्मेदवारी कायम रहेको छ। पार्टी सभापतिमा वर्तमान सभापति एवं प्रधानमन्त्री शेरबहादुर देउवा, प्रकाशमान सिंह, शेखर कोइराला, विमलेन्द्र निधि र कल्याण गुरुङको उम्मेदवारी कायम रहेको छ। पदाधिकारीमा देउवा, सिंह र कोइरालाले प्यानलै उम्मेदवारी दिएका छन् ।
महाधिवेशनमा १३४ पदका लागि ५४८ जनाले उम्मेदवारी दिएका थिए । आइतबार साढे १२ बजेसम्म उम्मेदवारी फिर्ता गर्ने समय दिइँदा ६० जनाले मनोनयन फिर्ता लिएका हुन् । निर्वाचन समितिले उम्मेदवारहरुको अन्तिम नामावली प्रकाशन गर्दैछ । (देशसंचारबाट)