प्रधानमन्त्री देउवाले बोलाए सर्वदलीय बैठक, एमाले सहभागी नहुने

google

४ पुस, हेटौंडा । प्रधानमन्त्री शेरबहादुर देउवाले आज आइतबार अपरान्ह ४ बजेका लागी संसदमा प्रतिनिधित्व गर्ने प्रमुख दल र पूर्व प्रधानमन्त्रीहरु सहित सर्वदलीय बैठक बोलाएका छन् ।
संघीय संसदमा देखिएको गतिरोध अन्त्यका लागि र एमसीसीका विषयमा छलफल गर्न प्रधानमन्त्री देउवाले सर्वदलीय बैठक आह्वान गरेको उनका प्रमुख स्वकीय सचिव भानु देउवाले जानकारी दिएका छन् । बैठक आइतबार ४ बजे प्रधानमन्त्रीको सरकारी निवास बालुवाटारमा बस्नेछ । 
तर प्रधानमन्त्री देउवाले बोलाएको सर्वदलीय बैठकमा प्रमुख प्रतिपक्षी दल नेकपा (एमाले) भने सहभागी नहुने भएको छ । माधवकुमार नेपाल नेतृत्वको नेकपा (एकीकृत समाजवादी) पार्टीलाई बोलाएकोले आफूहरू सर्बदलीय बैठकमा सहभागी नहुने एमालेका नेताहरूले बताएका छन् । आफ्नो पार्टीले मान्यता नदिएको दल उपस्थित हुने बैठकमा सहभागी नहुने उनीहरूको तर्क छ ।
संसद् अवरोध र एमसीसीबारे सरकारको नेतृत्व गरिरहेको दल कांग्रेससँग छुट्टै छलफल भने हुनसक्ने एमालेले जनाएको छ । प्रतिनिधिसभाको आगामी बैठक पुस ६ गते मंगलबारका लागि आह्वान गरिएको छ । उक्त दिनको बैठकमा एमसीसी सम्झौतालाई अगाडि बढाउने सरकारको तयारी रहेको छ ।
प्रमुख प्रतिपक्षी दल नेकपा (एमाले)ले भने लामो समयदेखि संसद् अवरुद्ध गर्दै आएको छ । आफूबाट विभाजित भएर नेकपा (एस) गठन गरेका माधवकुमार नेपाललगायत १४ सांसदलाई कारबाही गर्नुपर्ने माग राख्दै एमालेले विरोध गरिरहेको हो । उनीहरूलाई सांसद पदबाट मुक्त गर्नुपर्ने एमालेको माग छ ।