एमसीसीमा रहेका दुविधाबारे स्पष्ट भएपछि मात्रै छलफल अगाडी बढाउन दलहरुको सुझाव

५ मंसिर, हेटौंडा । राजनीतिक दलका नेताहरूले अमेरिकी सहयोगसम्बन्धी सम्झौता मिलेनियम च्यालेन्ज कम्प्याक्ट (एमसीसी)का बारेमा उत्पन्न संशयबारे स्पष्ट नभई अनुमोदन गर्न नसकिने बताएका छन् । 
कांग्रेस सभापति एवम् प्रधानमन्त्री शेरबहादुर देउवाले संसद् सञ्चालन र एमसीर्सी विषयमा छलफल गर्न सर्वदलीय बैठक बोलाएका थिए । बैठकमा सहभागी विभिन्न दलका नेताहरूले प्रधानमन्त्री देउवालाई एमसीसीका विभिन्न दफाहरूमाथि स्पष्ट नभई संसदमा अघि बढाउन र अनुमोदन गर्न नसकिने सुझाव दिएका हुन् ।
बालुवाटारमा बसेको बैठकमा प्रधानमन्त्री देउवाले एमसीसीका बारेमा विषय प्रस्तुत गरेका थिए । एमसीसी नेपालका लागि आवश्यक भएकाले यसलाई सरकारले संसद्मा प्रस्तुत गर्ने र अनुमोदनको प्रक्रिया अघि बढाउने विषय देउवाले राखेका थिए ।
देउवाले राखेको विषयमा पूर्वप्रधानमन्त्री बाबुराम भट्टराईले समर्थन जनाउँदै राष्ट्रिय सहमति बनाएर एमसीसी लागू गर्नुपर्ने बताएका थिए । कांग्रेस नेताहरू रामचन्द्र पौडेल, पूर्वअर्थमन्त्री रामशरण महतलगायतले त्यही विषयमा समर्थन जनाएका थिए । तर, अन्य दलका नेताहरूले भने एमसीसीका विषयमा अझै प्रस्ट नभई त्यसलाई संसद्मा पेस गर्ने वा अनुमोदन गर्ने वा नगर्ने विषयमा धारणा बनाउन नसकिने बताएका राष्ट्रिय जनमोर्चाका महासचिव मनोज भट्टले जानकारी दिए । 
बैठकमा नेकपा माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपालले भने एमसीसीमाथि उत्पन्न संशयहरूबारे स्पष्ट भएपछि मात्रै त्यसलाई अनुमोदन गर्ने वा नगर्ने भन्ने धारणा बनाउन सकिने बताएका थिए । 
यस्तै बैठकले प्रमुख विपक्षी दल नेकपा एमालेलाई संसद अवरोध नगर्न आह्वान गरेका छ । आइतबार बसेको सर्वदलीय बैठकले आफ्ना सहमति प्रकट गर्ने नाममा जननिर्वाचित संसदलाई बन्धन नबनाउन एमालेलाई आग्रह गरेको सरकारका प्रवक्ता सञ्चार तथा सूचना प्रविधिमन्त्री ज्ञानेन्द्रबहादुर कार्कीले जानकारी । 
सर्बदलिय बैठकमा प्रमुख प्रतिपक्षि दल एमाले भने सहभागि भएन । नेकपा एकिकृत समाजबादी पनि बैठमा जाने भए पछि आफुहरु नगएको एमाले नेताहरुले जानकारी दिएका छन् ।