सभ्य समाज निर्माणका लागि बालअधिकारको संरक्षण जरुरीः प्रमुख खुलाल

६ मंसिर, हेटौंडा । जिल्ला समन्वय समिति मकवानपुरका प्रमुख रघुनाथ खुलालले सभ्य समाज निर्माणका लागि बालअधिकारको संरक्षण हुनु पर्ने बताएका छन् ।
स्थानीय तहमा बाल अधिकार संरक्षण तथा सेवा प्रवाह सम्बन्धी तीन दिवशीय जिल्ला स्तरीय प्रशिक्षण कार्यक्रमको सोमबार हेटौंडामा उद्घाटन गर्दै प्रमुख खुलालले सुन्दर, समुन्नत र सभ्य समाज निर्माणका लागि बालअधिकारको संरक्षण हुनु पर्नेमा जोड दिए ।
प्रमुख खुलालले सामाजिक क्षेत्रको विकास विना समुन्त र समृद्ध समाज निर्माण हुन नसक्ने उल्लेख गर्दै भोलीका कर्णधार बालबालिका साझा भविष्य भएकोले उनीहरूको स्वतन्त्रता, अधिकार, संरक्षण, विकास र जीवनस्तर सुधारका लागि सामूहिक प्रतिवद्धता र साझा प्रयास आवश्यक रहेको बताए ।
उनले बालबालिको अधिकार संरक्षणका लागि तिनै तहको सरकार लगायत सवै नागरिकको सक्रियता एवम् सामूहिक प्रतिवद्धता र साझा प्रयास आवश्यक रहेको जोड दिए ।
यस्तै कार्यक्रममा जिल्ला समन्वय समितिका उपप्रमुख भगवती पुडासैनीले हरेक क्षेत्रबाट बालबालिकाका प्राथमिक सवालहरु सम्बोधन हुन आवश्यक रहेको बताईन् । उनले लैंगिक समतासंगै बालबालिकाले बाच्न पाउने, सहभागी हुन पाउने, सबै क्षेत्रमा भेदभाव रहित र बाल मैत्रीपुर्ण क्रियाकलाप संचालन गर्न आग्रह गरिन्
जिल्ला समन्वय समिति मकवानपुरको आयोजना एवम् राष्ट्रिय बाल अधिकार परिषदको समन्वय तथा सहजिकरणमा भएको कार्यक्रममा जिल्लाका १० वटै स्थानीय तहका उपप्रमुखहरु, महिला तथा बालबालिका शाखा प्रमुखहरु, बालबालिका हेर्ने संयोजक, शिक्षा शाखा प्रमुख, स्वास्थ्य शाखा प्रमुख र न्यायिक समितिका सहजकर्ताहरुको सहभागिता रहेको छ । 
तीन दिन सम्म संचालन हुने प्रशिक्षण कार्यक्रममा बाल अधिकार परिषदका बालबालिका विज्ञ, कानु अन्वेषण तथा स्रोत विकास केन्द्र (सेलर्ड) का राममणि गौतम, कपिल अर्याल, जग्गनाथ सुवेदीलगायतले सहजिकरण गर्ने छन् ।