समानुपातिक विज्ञापनका लागि महासंघद्वारा उद्योगी व्यवसायीसंग छलफल

१३ पुस, हेटौंडा । नेपाल पत्रकार महासंघ मकवानपुरले समानुपातिक विज्ञापनका लागि उद्योग संघ मकवानपुर र मकवानपुर उद्योग वाणिज्य संघसंग सोमबार छलफल गरेको छ ।पत्रकार महासंघ मकवानपुरका अध्यक्ष मणिराज गौतम नेतृत्वमा गएको टोलीले जिल्लामा संचालित मिडिया आर्थिक रुपमा धरासायी हुने अवस्था सिर्जना भएको भन्दै आवश्यक समन्वयकारी भूमिका निर्वाह गरिदिन आग्रह गरको छ । प्रदेश राजधानी हेटौंडामा संचालित उद्योगहरुले ठुला सञ्चार गृहलाई मात्रै विज्ञापन दिने परिपाटीका कारण स्थानिय मिडिया समस्यामा पर्न थालेको भन्दै सबैलाई समानुपातिक विज्ञापन वितरणको पहल गरिदिन महासंघले माग गरेको छ ।
छलफलका क्रममा उद्योग संघ मकवानपुरका अध्यक्ष लेखराज पोखरेलले उद्योगहरु पनि मिडियामैत्री हुन चाहेको भन्दै समन्वय गर्न आफुहरु सकारात्मक रहेको बताए ।
छलफलमा संघका वरिष्ठ उपाध्यक्ष स्वागतराज प्याकुरेल, महासचिव बासु कार्की लगायतको सहभागीता रहेको थियो ।
महासंघले मकवानपुर उद्योग वाणिज्य संघका प्रतिनिधिसंग पनि छलफल गरेको छ । छलफलमा मकवानपुर उद्योग वाणिज्य संघका अध्यक्ष कृष्ण कुमार गुप्ता अग्रवालले केहि समयदेखि मिडिया र संघबीच मिडियामैत्री वातावरणमा कमी देखिएको बताउँदै एकद्वार प्रणाली भइदिए विज्ञापन बाँडफाँडमा सहजता हुने बताए । 
छलफलमा संघका वरिष्ठ उपाध्यक्ष अनिल अग्रवाल, एशोसियट तर्फका अर्का उपाध्यक्ष उज्वल चौलागाई र महासचिव दिपक उप्रेतीको उपस्थिति रहेको थियो । 
छलफलमा पत्रकार महासंघ मकवानपुरका उपाध्यक्ष धुव्र अधिकारी, अर्का उपाध्यक्ष सरला अधिकारी, सहसचिव एमपी शर्मा, सदस्यहरु सिर्जना नेपाल, रुपा गुरुङ, बलराम पुडासैनी, विजय पौडेल, नवराज वाइवा लगायतको सहभागिता रहेको थियो ।