डिभाइन युथ क्लवद्वारा विद्यार्थीलाई न्यानो कपडा वितरण

१९ पुस, हेटौंडा । डिभाइन युथ क्लवले मकवानपुरको बकैया गाउँपालिकामा बिद्यार्थीहरुलाई न्यानो कपडा वितरण गरेको छ । बकैया-६ मोरङ्गधापको सगरमाथा प्राविका विद्यार्थीहरुलाई न्यानो कपडा बितरण गरेको हो ।
विद्यालयमा पढ्ने ८७ जना विद्यार्थीहरुलाई बकैया गाउँपालिका बडा नम्बर ६ का वडा अध्यक्ष फुलबहादुर भोम्जन, बिद्यालय व्यवस्थापन समितिका अध्यक्ष अमर पाख्रिन, बिद्यालय व्यवस्थापन समितिका पूर्व अध्यक्ष रबिन्द्र पाख्रिन र प्रध्यानाध्यापक बिष्णुकुमारी स्याङतान लगायतले सुइटर र टोपी वितरण गरेका थिए ।
बिद्यालयमा माखलो ज्यामिरे, बडार खोला, मोरङ्गधाप लगायतका गाउँहरुबाट बिद्यार्थीहरु पढ्न आउने गरेका छन् । तामाङ समुदायको बाहुल्यता रहेको यस स्थानमा अशिक्षा र गरिबिका कारण धेरै बिद्यार्थीहरुले बिचैमा पढाई छाड्ने, बिद्यालय नजाने समस्या रहेको बिद्यालयकी प्रध्यानाध्यापक बिष्णुकुमारी स्याङतानले बताइन् । सानै उमेरमा पढाई छाडेर बिद्यार्थीहरु आर्थिक उपार्जनका लागि काठमाडौंमा गलौचा फ्याक्ट्रिमा काम गर्न समेत जाने गरेको उनको भनाइ छ । करिव डेढ घण्टा हिडेर बिद्यार्थीहरु बिद्यालय पुग्ने गरेका छन् । आर्थिक रुपले बिपन्न रहेका बिद्यार्थीहरु जाडोमा न्यानो सुइटर, टोपी पाएपछि खुसी भएका थिए ।
डिभाइन युथ क्लवमा रहेका पदाधिकारीहरुले आफूले खाजा खाने रकमबाट बचाएर विद्यार्थीहरुलाई न्यानो कपडा वितरण गरेको कार्यक्रम संयोजक सागर पन्थीले बताए । डिभाइन युथ क्लव हेटौंडाले यस अघि राक्सिराङ गाउँपालिकामा चेपाङ समुदायलाई ब्ल्याङकेट बितरण गरेको थियो ।