मकवानपुर कांग्रेसले जनजाति नेतृत्व पाउने अवसर

१७ फागुन, हेटौंडा । नेपाली कांग्रेस मकवानपुरले जनजाति समुदायबाट नेतृत्व पाउने अवसर पाएको छ ।
सभापतिका प्रतिष्पर्धीमध्ये बुद्ध लामा र आनन्दराम पराजुली दोस्रो चरणमा प्रवेश गरेसंगै कांग्रेस मकवानपुरले नेतृत्वमा जनजाति समुदायको प्रतिनिधित्व पाउने अवसर जुटेको हो ।
तामाङ समुदायको बाक्लो बसोबास रहेको मकवानपुरमा तामाङ समुदायका लामा पहिलो चरणमा सबैभन्दा बढि मत ल्याउँदै दोस्रो चरणमा पुगेका छन् । 'सूर्यबहादुर डिम्डुङले संगठन गरेर अघि बढाएको मकवानपुरे कांग्रेसले ३ दशकपछि पुन: जनजाति समुदायको प्रतिनिधि नेतृत्वमा आउने अवसर पाउनु सुखद कुरा हो'- पुराना कांग्रेस नेताहरू भन्छन् । अब लामालाई नेतृत्व दिएर मतदाताले न्याय गर्नुपर्ने उनिहरूको भनाइ छ ।
बानियाँको समावेशिताको अवधारणा अनुसार जनजातिबाट नेतृत्वमा लामा र उपसभापतिमा दलितबाट गोपिलाल विकसहितको समूह बनेको जनाइएको छ । पश्चिमी क्षेत्रमा बढि प्रभाव रहेका लामा यसअघि जिल्ला सचिव थिए ।
१७७५ मत खसेकोमा सभापतिका उम्मेदवार बुद्ध लामाले सबै भन्दा बढी ५९५ मत प्राप्त गतेपनि उक्त मत ५१ प्रतिशत नपुग्दा निर्वाचन दोस्रो चरणमा धकेलिएको हो ।
उनका प्रतिष्पर्धी आनन्दराम पराजुलीले दोस्रो रहदै ५४५ मत प्राप्त गरेका छन् । पराजुली युवा पुस्ता र नगर क्षेत्रमा  रूचाईएका व्यक्तित्व हुन् । उनी निर्वतमान नगर सभापति हुन् । उनलाई सहमहामन्त्री महालक्ष्मी उपाध्याय डिनाको समर्थन छ ।
तेस्रो स्थानमा रहदै ५३१ मत ल्याएका जयराम लामिछानेको झुकावले दोस्रो चरणको चुनावलाई प्रभावित गर्ने छ । भए सहमति र नभए प्रक्रियामार्फत आजै नेतृत्व टुंगो लाग्दैछ ।