प्रधानन्यायाधिस बिरुद्धको महाअभियोग अध्ययन सिफारिस समिति गठन

२३ फगुन, हेटौंडा । संसदले प्रधानन्यायाधीश चोलेन्द्रशमशेर जबराविरुद्ध दर्ता भएको महाअभियोग प्रस्तावमाथि छलफलको प्रक्रिया अघि बढाएको छ ।
प्रतिनिधिसभाको आइतबार बसेको बैठकले ११ सदस्यीय महाअभियोग सिफारिस समिति बनाएको हो । जसमा नेकपा एमालेका चार जना, नेपाली काँग्रेस र माओवादी केन्द्रका दुई–दुई जना तथा नेकपा एकीकृत समाजवादी, जनता समाजवादी पार्टी र लोकतान्त्रिक समाजवादी पार्टीका एक–एक जना सांसद रहेका छन् ।  
समितिका सदस्यहरुमा एकवाल मियाँ, कल्याणी खड्का, कृष्णभक्त पोखरेल, प्रमोद शाह, मिनबहादुर विश्वकर्मा, यशोदा गुरुङ, राम बहादुर विष्ट, रेखा शर्मा, लालबाबु पण्डित र शिवमाया तुम्बाहाङ्फे रहेका छन् ।
यो समितिले अब एकजना अध्यक्ष चुन्ने काम गर्नेछ । त्यसपछि महाभियोग प्रक्रिया कसरी अगाडि बढाउने, अनुसन्धान कसरी गर्ने भन्नेबारे कार्यविधि बनाउने व्यवस्था रहेको संघीय संसद सचिवालयका प्रवक्ता डा.रोजनाथ पाण्डेले जानकारी दिए ।
प्रतिनिधिसभा नियमावली २०७५ अनुसार यो सिफारिस समितिले सदस्यमध्यबाट कसैलाइ सभापति चयन गरेर अध्ययन प्रक्रिया अगाडी बढाउनुपर्ने हुन्छ ।  सत्तारुढ गठबन्धनका ९८ सांसदले फागुन १ मा जबराविरुद्ध महाअभियोग प्रस्ताव दर्ता गरेका थिए । 
महाअभियोग प्रस्तावमा जबरामाथि न्यायपालिकाको जगेर्ना गर्न असक्षम रहेको, अदालतमा भ्रष्टाचार र विचौलियाले प्रवेश पाएको, संवैधानिक जिम्मेवारीको दुरुपयोग गरेको लगायतका २१ वटा आरोप लगाइएको छ ।