महिला पत्रकारलाई स्यानेटरी प्याड वितरण शुभारम्भ

२५ फागुन, हेटौंडा । सञ्चारिका समूह नेपाल मकवानपुरले महिला पत्रकारहरुका लागि स्यानेटरी प्याड वितरण शुभारम्भ गरेको छ । ११२ औं नारी दिवसको अवसरमा सञ्चारिका समूह मकवानपुरले मंगलबार पत्रकार महिलाहरुबीच मैत्रीपूर्ण फुटसल खेलको आयोजना गर्दै प्याड वितरण कार्यक्रमको शुभारम्भ गरेको हो ।
मंगलबार एक औपचारिक कार्यक्रमको आयोजना गरी प्याड वितरणको सुरुवात गरिएको हो । कार्यक्रममा प्रमुख अतिथि हेटौंडा उपमहानगरपालिकाकी उपमेयर मीनाकुमारी लामाले स्यानेटरी प्याड हस्तान्तरण गर्दै कार्यक्रमको शुभारम्भ गरेकी हुन् । उनले महिला पत्रकारहरुले सुरु गरेको प्याड वितरण कार्यक्रमलाई अझै प्रभावकारी बनाउन सहयोग गर्ने प्रतिवद्धता समेत व्यक्त गरिन् ।
सञ्चारिका समूह नेपाल मकवानपुरले उपलब्ध गराउने स्यानेटरी प्याड पत्रकार महासंघ मकवानपुरको कार्यलयमा राखिने र आवस्यक पर्ने महिला पत्रकारहरुले लैजान सक्ने सञ्चारिका समूहकी मकवानपुर अध्यक्ष सम्झना रिजालले जानकारी दिईन । कार्यस्थलमा निस्केका बेला कहिलेकाँही आकस्मिक रुपमा चाहिन सक्ने भएकाले स्यानेटरी प्याडको सहज उपलब्धताका लागी समूहले निशुल्क वितरण सुरु गरिएको अध्यक्ष रिजालले बताईन ।
सञ्चारिका समूह नेपाल मकवानपुरकी अध्यक्ष सम्झना रिजालको अध्यक्षतामा भएको कार्यक्रममा पत्रकार महासंघ बागमती प्रदेश उपाध्यक्ष सम्झना कार्की, पत्रकार महासंघ मकवानपुर अध्यक्ष मणिराज गौतम, उपाध्यक्ष धु्रव अधिकारी, सञ्चारिका समूह बागमती प्रदेश अध्यक्ष सरिता दाहाललगायतको उपस्थिति रहेको थियो ।