तेस्रो अभ्यास खेलमा पनि नेपाली टोलीलाई सफलता

२७ फागुन, हेटौंडा । युएईमा हुने विश्व क्रिकेट लिग–२ को तयारी स्वरूप अभ्यासका लागि श्रीलंका भ्रमणमा रहेको नेपाली क्रिकेट टोलीले बिहीबार श्रीलंका पुलिसालई १ सय ४४ रनले पराजित गर्दै जितलाई निरन्तरता दिएको छ । 
नेपालले दिएको ३ सय ३२ रनको लक्ष्य पछ्याएको श्रीलंका पुलिस ३६ ओभर ५ बलमा मात्र १ सय ८७ रन बनाउँदा अलआउट भयो । श्रीलंका पुलिसका कप्तान सी सिल्भाले ६४ रनको अर्धशतकीय इनिङ खेले । यस्तै एस मौर्याले ५० तथा एल वेभिताले ३७ रन बनाउनु बाहेक अन्य खेलाडीले दोहोरो अंक छुन सकेनन् ।    
नेपालको जितमा करण केसीले अलराउण्ड प्रदर्शन गरे । विस्फोटक ब्याटिङ गर्दै अर्धशतक प्रहार गरेका करणले बलिङतर्फ ३ विकेट हात पारे । यस्तै सागर ढकाल, कमल सिंह ऐरी तथा कप्तान सन्दीप लामिछानेले समान २÷२ विकेट लिए ।
यसअघि टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर ३ सय ३१ रन बनायो । श्रीलंका पुलिसविरुद्ध नेपालका रोहितकुमार पौडेलले सर्वाधिक ७२ रनको इनिङ खेले । कुशलले ५७ रनको अर्धशतकीय इनिङ खेल्दा करणले ५३ रन जोडे । अर्का ओपनर आसिफ ५२ रन बनाएर मैदान बाहिरिए ।
कमल सिंह ऐरीले अविजित ४५ रनको योगदान गरे । आरिफ शेखले २६, बिनोद भण्डारीले ३, पवर सर्राफले ३ र भिम सार्कीले २ रन बनाए । श्रीलंका पुलिसका टी सम्पथ र एम प्रियदर्शनाले समान २÷२ विकेट हात पारे । 
४ अभ्यास खेलका लागी श्रीलंकामा रहेको नेपाली टोली मार्च १४ मा युएई प्रस्थान गर्ने कार्यक्रम रहेको छ । आईसीसी पुरुष विश्वकप क्रिकेट लिग टु अन्तर्गत हुने एकदिवसीय सिरिजको तयारीमा रहेको नेपाली राष्ट्रिय क्रिकेट टिमले उक्त सिरिजमा युएई र पपुवा न्यू गिनी (पीएनजी) विरुद्ध खेल्नेछ ।