स्थानीय तह निर्वाचनमा उम्मेदवारले मनलाग्दी खर्च गर्न नपाउने

२८ फागुन, हेटौंडा । निर्वाचन आयोगले आगामी बैशाख ३० गते हुने स्थानिय तहको निर्वाचनमा भाग लिने दलका उम्मेदवारले प्रचारप्रसारमा गर्ने खर्चमा सीमा निर्धारण गरेपछि फजुल खर्च गर्न नपाउने भएका छन् ।
निर्वाचन आयोगले चुनवामा उम्मेदवारहरुले मतदाता प्रभावित पार्न विभिन्न खाले प्रचारप्रसारमा फजुल खर्च गर्ने गरेको भन्दै चुनावलाई मर्यादित र मितव्यइ बनाउने भन्दै उम्मेदवारले चुनावमा गर्ने खर्चको सीमा अर्थात सिलिङ तोकेको जनाएको छ ।
आयोगले शुक्रबार स्थानीय तहको निर्वाचनका सन्दर्भमा गरिएका काम र प्रगतिका बारेमा जानकारी दिन आयोजना गरेको सर्वदलीय बैठकमा दलहरूलाई उम्मेदवारको खर्च सीमाको बारेमा जानकारी गराएको हो ।
आयोगका अनुसार स्थानीय तहअन्तर्गतको सबैभन्दा ठूलो निकाय महानगरपालिकाको प्रमुख वा उपप्रमुखका उम्मेदवारले बढीमा ७ लाख ५० हजार रुपैयाँसम्म खर्च गर्ने पाउनेगरी सीमा तोकिएको छ । 
यसैगरी, उपमहानगरपालिकाका प्रमुख वा उपप्रमुखका उम्मेदवारले बढीमा ५ लाख ५० हजार र नगरपालिकाको प्रमुख वा उपप्रमुखको उम्मेदवारले बढीमा ४ लाख ५० हजार रुपैयाँ खर्च गर्न पाउने सीमा तोकिएको छ ।
आयोगले गाउँपालिकाका अध्यक्ष वा उपाध्यक्षले बढीमा ३ लाख ५० हजार रुपैयाँ खर्च गर्न पाउनेगरी सीमा तोकेको छ भने महानगरका वडाध्यक्ष वा सदस्यका उम्मेदवारले बढीमा ३ लाख र उपमहानगरका वडाध्यक्ष वा सदस्यका उम्मेदवारले बढीमा २ लाख ५० हजार रुपैयाँ खर्च गर्न गर्न पाउनेगरी सीमा निर्धारण गरिएको छ ।