बागमती प्रदेश प्रमुख शर्माद्वारा सेन्टर फर अटिजमको अवलोकन

३० फागुन,हेटौंडा। बागमती प्रदेशका प्रदेश प्रमुख यादव चन्द्र शर्मा  अटिजम भएका बालबालिकाका लागि संचालनमा ल्याइएको सिकाई केन्द्र ‘सेन्टर फर अटिजम’ को अवलोकन गरेका छन्।  सोमबार दिउँसो हेटौंडा ४, कर्रास्थित अटिजम भएका बालबालिकाका लागि संचालनमा ल्याइएको सिकाई केन्द्र ‘सेन्टर फर अटिजम’ को अवलोकन गरेका हुन।

अवलोकनका क्रममा प्रदेश प्रमुख शर्माले अटिजम सन्तानका आमाबाट संचालन आरम्भ भएको सेन्टरलाई सफलताको कामना गर्दै यस कार्यबाट आफू प्रभावित बनेको बताएका छन्। प्रमुख शर्माले अटिजम भएका बालबालिकालाई ध्यान दिएकोमा सेन्टरले धन्यबाद दिदै अटिजम भएका बालबालिकाको सिकाई तथा विकास अभिवृद्दि भई सक्षम नागरिक तयार गराउँन सघाउ पुग्नेछ भन्ने आशा लिएको बताए। 

सेन्टरमा हाल अटिजम भएका ३ देखि १० वर्षका १३ जना बालक रहेका छन् । विहान १० बजेदेखि अपरान्ह ४ बजेसम्म उनीहरुलाई आवश्यकता अनुसार सिकाई तथा थेरापी पद्दतीबाट उपचार गराईने सेन्टरकी संयोजक अस्मिता कालिका थपलियाले जानकारी दिइन् । 

अहिले भाडाको घरमा संचालन गरिएको सेन्टरको संयोजक थपलिया, निशला श्रेष्ठ र उमा पौडेलले व्यवस्थापन गरिरहेका छन् । एक जना अकुपेसनल थेरापिस्ट तथा अन्य ८ जना शिक्षक गरी ९ जना कर्मचारीको पारिश्रमिक तथा अन्य आवश्यक व्यवस्थापन उनीहरुले गरिरहेका छन्।आफ्नै बच्चाको सिकाई तथा उपचार हुनाका साथै समुदायका अन्य अटिजम बालबालिकालाई लाभ पुगिरहेको सेन्टरका सचिव शेखर थपलियाले बताए ।