आयोजकलाई हराउँदै पिप्ले राजर्षी जनक कप फुटबलको फाइनलमा

११ चैत, हेटौंडा । आयोजक बागमती युवा क्लवलाई टाइब्रेकरमा निराश बनाउँदै साविक विजेता हेटौंडाको पिप्ले युवा क्लव छैठौं राजर्षी जनक कप फुटबल प्रतियोगिताको फाइनलमा प्रवेश गरेको छ । 
बिहीबार सम्पन्न सेमिफाइनलमा आयोजकलाई टाइब्रेकरमा ४–२ गोल अन्तरले हराउँदै पिप्ले उपाधि नजिक पुगेको हो । निर्धारित समय गोलरसहित बराबरी भएपछि खेलको टाइब्रेकरमा केलिएको थियो ।
पिप्लेको जितका लागी अशोक खवास, ऋतिक खड्का, कुलदीप कार्की र मार्टिन्सको प्रहार गोलमा परिणत हुँदा सर्लाहीका आयुष राना मगर र अनिल रानाले मात्रै गोल गरेका थिए । सर्लाहीका अमर श्रेष्ठको प्रहार पिप्लेका गोलरक्षक अनिष देउलाले बचाउ गर्दा ईमान घलानको प्रहार बाहिरिएको थियो । 
खेलमा पिप्लेका गोलरक्षक देउला नै म्यान अफ द म्याच भए । उनले नगद १० हजार रुपैयाँसहित ट्रफी प्राप्त गरे । अब पिप्लेले उपाधिका लागि मछिन्द्र क्लव र सुदूरपश्चिम ११ को विजेतासंग १३ गते आइतबार खेल्नेछ ।
बागमती युवा क्लव सर्लाहीको आयोजना तथा बागमती नगरपालिकाको सहयोगमा जारी छैठौं राजर्षी जनक कप फुटबल प्रतियोगिताको विजेताले नगद १० लाख एक हजार र उपविजेताले ५ लाख ५ सय रुपैयाँसहित ट्रफी, मेडल र प्रमाणपत्र प्राप्त गर्नेछ । 
गत बर्षपनि आयोजकलाई टाइब्रेकरमै हराउँदै उपाधि जितेको पिप्लेले यस बर्षपनि फाइनलमा स्थान बनाएको हो । सन्तोष श्रेष्ठ स्मृति खेल मैदान बागमती नगरपालिका–११ सर्लाहीमा जारी प्रतियोगिताको सर्वोत्कृष्ट खेलाडीसहित विधागत उत्कृष्ट खेलाडी र प्रशिक्षकले पनि नगदसहित ट्रफी प्राप्त गर्नेछन् ।