युवतीलाई छुरा प्रहार गर्ने यादवको मकवानपुर प्रहरीसमक्ष आत्मसमर्पण

९ बैशाख,हेटौंडा। हेटौंडा-७ हरियालीमा छुरा प्रहार गरी युवती घाइते बनाइ फरार  युवकलाई  मकवानपुर प्रहरीले नियन्त्रणमा लिएको छ। हेटौंडा-२ बस्ने २९ बर्षीय सृजन यादव मकवानपुर प्रहरीमा आएर आत्मसमर्पण गरेसँगै उनलाई नियन्त्रणमा लिएको हो।

यादवले चैत ११ गते हेटौँडामा मानवअधिकारको क्षेत्रमा काम गर्दै आएकी हेटौंडा-७ बस्ने २४ वर्षीया अनिशा राईलाई छुरा प्रहार गरेका थिए।यादव छुरा प्रहारबाट लगत्तै फरार रहेका थिए।उनलाई नेपाल प्रहरीको सहयोगमा मकवानपुर प्रहरीले खोजि गरिरहेको थियो। अनिशालाई छुरा प्रहार गरी फरार यादव बुधबार साँझ आफैँ जिल्ला प्रहरी कार्यालय मकवानपुरमा आएर  आत्मसमर्पण गरेको मकवानपुर प्रहरी प्रवक्ता प्रहरी नायब उपरीक्षक टेक बहादुर कार्कीले जानकारी दिएका छन्।उनलाई  ज्यान मार्ने उद्योगमा मुद्दा दर्ता ५ दिनको म्याद थप गरेर अनुसन्धान थालिएको जनाइएको छ। 
"हामीले घटनाको कारण बुझन  आवश्यक अनुसन्धानमा सुरु गरिसकेका छौ,थप कुरा अनुसन्धानले बताउछ"- प्रहरी नायब उपरीक्षक कार्कीले भने। 
यादवको छुरा प्रहारबाट युवतीको घाँटीको पछाडि भागमा चोट लागेको थियो । उनी काठमाडौंमा रहेको राष्ट्रिय ट्रमा सेन्टरमा उपचारपश्चात् केही दिनअघि मात्र डिस्चार्ज भएकी थिइन।