मकवानपुरगढीमा १४५ को मनोनयन,एक दलित वडासदस्य निर्विरोध

१३ बैशाख,हेटौंडा। बैशाख ३० गते हुन  स्थानीय तह सदस्य निर्वाचन अन्तर्गत मकवानपुरको मकवानपुरगढी गाउँपालिकामा १४५ ले उम्मेदवारीको मनोनयन दर्ता गराएका छन् ।
गाउँपालिकामा अध्यक्ष, उपाध्यक्ष,  र  ८ वडा अध्यक्ष र वडा सदस्य पदका लागि  १४५ जनाले उम्मेदवारी दर्ता गराएको मकवानपुरगढीका मुख्य निर्वाचन अधिकृत नारनप्रसास पोखरेलले बताएका छन्। 
पोखरेलले उल्लेख गरे अनुसार 
गाउँपालिका अध्यक्ष पदमा ६ जनाले उम्मेदवारी दर्ता गराएको जसमा एमालेको तर्फबाट विदुर हुमागाई, कांग्रेस,माओवादी केन्द्र,नेकपा एस गठबन्धनबाट कांग्रेसका दोर्जे लामा स्याङ्तान,राप्रपाबाट विजय सिंह ठकुरी, मंगोल नेशनल पार्टीका युवराज लामा, स्वतन्त्रबाट कृष्णप्रसाद कंडेल र युवराज तिमल्सिनाले उम्मेदवारी दर्ता गराएका हुन। 
त्यसैगरी उपाध्यक्ष पदमा तिनवटा राजनैतिक दलबाट तीन जनाले उम्मेदवारी मनोनयन दर्ता गरेका छन्। एमालेबाट सन्तु थिङ, कांग्रेस,माओवादी केन्द्र र नेकपा एस गठबन्धन नेतृत्वबाट मोओवादी केन्द्रकी मानकुमारी पाख्रीन(नेपाली) र राप्रपाबाट हिरादेवी हुमागाईले उम्मेदवारी दर्ता गराएको पोखरेलले बताए।पोखरेलले पालिकाको ८ वटा वडाका लागि विभिन्न राजनैतिक दल र स्वतन्त्र गरि ३७ जनाले वडा अध्यक्षमा उम्मेदवारी दर्ता गरेको बताए ।

यता महिला सदस्यमा २५ जना, दलित महिलामा १८ जनाले उम्मेदवारी दर्ता गराएको र ७ नम्बर वडामा दलित महिला सदस्यमा मनोनयन दर्ता गरेकी तीर्थ कुमारी ल्वागुन निर्विरोध भएको बताइएको छ। तीर्थ कुमारी ल्वागुनले नेकपा एमालेबाट उम्मेदवारी दिएकी थिइन। उक्त पदमा अरुको उम्मेदवारी नपरेकोले निर्विरोध भएको पोखरेलले बताएका छन्।वडा सदस्य खुलामा भने ५६ जनाले उम्मेदवारी दिएका छन् ।