हेटौंडाका एमालेका दुई सहित मकवानपुरमा ८ जना उम्मेदवार विरुद्ध उजुरी

१४ बैशाख,हेटौंडा। यहि बैशाख ३० गतेमा हुने स्थानीय तह सदस्य निर्वाचनका लागि मकवानपुरमा मनोनयन दर्ता गराएका आठजना विरुद्ध उजुरी परेको छ । 
मकवानपुरका स्थानीय तह निर्वाचनका खटिएका मुख्य निर्वाचन अधिकृतहरुका अनुसार बकैया गाउँपालिकामा तीनजना मनहरी गाउँपालिकामा दुई ,बागमती गाउँपालिकामा एक जना र हेटौंडामा दुईजना गरी ८ जना उम्मेदवार विरुद्ध उजुरी परेको हो ।

बकैंया गाउँपालिका  नेपाली कांग्रेसका उपाध्यक्ष छाँया अधिकारी,नेकपा माओवादीका उपाध्यक्ष भक्त खत्री र नेपाली कांग्रेसका वडा नम्बर ५ का लक्ष्मी जिम्बाविरुद्ध उजुरी परेको निर्वाचन अधिकृत आनन्दराज पोखरेलले बताए।उनका अनुसार उजुरी परेकालाई लिखित स्पष्टिकरण दिन भनिएको जनाइएको छ।
 त्यसैगरी  मनहरी गाउँपालिकामा  नेकपा एकिकृत समाजवादीको तर्फबाट उपाध्यक्ष उम्मेदवारी दिएकी मनिला बिष्ट विरुद्ध वेरुजुसम्बन्धी  र नेपाली कांग्रेसका वडा नम्बर ३ वडाअध्यक्षका उम्मेदवार आन्नत प्रसाद अर्याल विरुद्ध उजुरी परेको हो। उनीले आफ्नो पदबाट  राजिनामा नदिएको भन्दै उजुरी परेको मनहरीका निर्वाचन अधिकृत पुर्ण बहादुर दर्जीले जानकारी दिएका छन्।
यता हेटौंडा उपमहानगरपालिका एमालेबाट वडाध्यक्षमा मनोनयन दर्ता गराएका दुईजना उम्मेदवार विरुद्ध उजुरी परेको छ। 
उजुरी पर्नेमा एमालेका तर्फबाट ४ नम्बर वडाअध्यक्षमा मनोनयन दर्ता गराएका नविन सिग्देल र १९ नम्बर वडाध्यक्षका लागि मनोनयन दर्ता गरेका नरनाथ सुवेदीविरुद्ध उजुरी परेको  हेटौंडाका सहायक निर्वाचन अधिकृत सागर शर्माले जानकारी दिएका छन् । सिग्देलविरुद्ध अबैधानिक उपभोक्ता समिति गठन गरी राज्यकोणको पैसा हिनामिना गरेको र सुबेदीविरुद्ध कर छली गरेको उजुरी परेको शर्माले बताएका छन्।उनले दुईजनालेनै लिखित स्पष्टिकरण दिएको र वाकी कुरा अनुसन्धानमै रहेको बताए। 

त्यसैगरी बागमती गाउँपालिकामा नेपाली कांग्रेसका उपाध्यक्षका उम्मेदवार फणिन्द्र प्रसाद तिम्लसिना विरुद्ध उजुरी परेको गाउँपालिकाका निर्वाचन अधिकृत हरि प्रसाद उपाध्यायले जानकारी दिए ।उजुरी परेका विरुद्ध आरोप पुष्टि भएको खण्डमा उम्मेदवारको उम्मेदवारी खारेज हुनसक्ने निर्वाचन अधिकृतहरुको भनाई छ । निर्वाचन आयोगको भोलि १५ गते नामावली प्रकाशन गर्ने तालिका रहेको छ।