गठबन्धन बिरुद्ध उठेका उम्मेद्वारलाइ फिर्ता गराउन कसरत

१५ बैशाख, हेटौंडा । सत्तारुढ दलले गठबन्धन बिरुद्ध उठेका उम्मेद्वारलाइ फिर्ता गराउने निर्णय गरेको छ । बुधबार बसेको सत्ता गठबन्धनको बैठकले गठबन्धनको बिरुद्धमा बागी उठेका उम्मेद्वारलाइ फिर्ता गराउने निर्णय गरेको हो । 
महानगरपालिका सहित उपमहानगरपालिका र अन्य पालिकाहरूमा पनि ठाउँ ठाउँमा बागी उम्मेद्वार उठेका थिए । ति उम्मेद्वारलाइ उम्मेद्वारी फिर्ता गराउन लगाइ गठबन्धनमा भएको सहमति कार्यान्वयन गर्ने सहमति पनि भएको छ ।  
यस्तै, नेकपा एमालेसँग भएको चुनावी तालमेल पनि खारेज गर्ने सहमति भएको छ ।  गठबन्धन बाहेकका दलसँग तामेल नगर्ने र तालमेल गरेको ठाउँमा सम्बन्धित दलले अविलम्ब खारेज गर्ने निर्णय भएको छ । दलहरूले यसअघि पनि गठबन्धनमा आवद्ध दल बाहेक अरुसँग तालमेल नगर्ने सहमति गरेका थिए । 
यस्तै सत्तारुढ दल नेपाली काँग्रेसका महामन्त्री गगनकुमार थापाले स्थानीय तहको निर्वाचनमा स्वतन्त्र ढंगले उम्मेदवारी दिएका पार्टीका नेता, कार्यकर्तालाई फिर्ता लिन आग्रह गरेका छन् ।  
महामन्त्री थापाले निर्वाचनमा होमिएका बेला पार्टीको निर्णयको सम्मान गर्दै आफ्नो स्वतन्त्र उम्मेदवारी फिर्ता लिन पार्टीका नेता, कार्यकर्तालाई आग्रह गरेका हुन् ।
उनले गठबन्धन गरेर अघि जाने क्रममा भएका कमी कमजोरीबारे पार्टीले निर्वाचनपछि छलफल गर्ने उल्लेख गर्दै निर्वाचनमा होमिएको बेला पार्टीको निर्णय विपरीत उम्मेदवारी दिन नमिल्ने उल्लेख गरेका छन् ।