स्थापितको अभिव्यक्ति कानुनी रूपमा दण्डनीय भएकाले कारवाहीको माग

१७ बैशाख, काठमाडौं । काठमाडौं महानगरपालिकाका मेयर उम्मेदवार केशव स्थापितको अभिव्यक्ति कानुनी रूपमा दण्डनीय भएकाले कारवाहीको माग गरिएको छ ।
स्थापितले सार्वजनिक कार्यक्रमहरूमा महिलालाई होच्याउने र चरित्र हत्या गर्ने जस्ता असंवेदनशील अभिव्यक्ति दिने गरेको भन्दै ओरेक, महिला मानव अधिकार रक्षकहरूको राष्ट्रिय सञ्जाल लगायत अधिकारवादी संघसंस्थाहरूले गम्भीर ध्यानाकर्षण भएको जनाएका छन् । 
स्थापितले आफूलाई लागेको आरोपको बारेमा स्पष्टीकरण दिनुको साटो उल्टै प्रश्न गर्ने महिलाहरूको चरित्र हत्या गर्ने अभिव्यक्ति दिनु निन्दनीय र कानुनी रूपमा दण्डनीय रहेको ति संस्थाहरूको भनाई छ ।
यौन दुर्व्यवहारको आरोपमा मुछिएका स्थापितलाई उनी आबद्ध पार्टीले त्यस्तो संवेदनशील विषयलाई बेवास्ता गरी मेयरको उम्मेदवारीमा उठाएकोमा पनि अधिकारवादी संस्थाले आपत्ति जनाएका छन् । 
स्थापितको 'यु आर नाइस लेडि तर तपाईको थुतुनो ठिक छैन भन्ने र यो बहिनीले वेश्यावृत्ति गर्छ भनेर म पनि छपाऊँ जस्ता निकृष्ट र अत्यन्तै असंवेदनशील अभिव्यक्ति आफैमा लैङ्गिक हिंसा बताउँदै उनी मेयरको उम्मेदवार हुन लायक छैनन् भन्ने स्पष्ट भएको विज्ञप्तिमा जनाइएको छ । व्यक्तिको मौलिक हक कुण्ठित गर्ने उनका कार्यलाई राज्यले तुरुन्त कारबाहीको दायरामा ल्याउनुपर्ने जनाइएको छ ।