प्रधानमन्त्री देउवाद्वारा मन्त्रीपरिषदमा हेरफेर, माओवादीका मन्त्रीहरु विना विभागीय बनाइए 

३१ असोज, हेटौँडा । प्रधानमन्त्री शेरबहादुर देउवाले माओवादी केन्द्रबाट सहभागी मन्त्रीलाई विना विभागीय बनाएका छन् । सरकारबाट बाहिरिन गरेको आग्रह माओवादीले अस्वीकार गरेपछि प्रधानमन्त्री देउवाले माओवादीका तर्फबाट बनेका मन्त्रीलाई जिम्मेवारी मुक्त गर्दै राप्रपाका तर्फबाट बनेका मन्त्रीलाई जिम्मेवारी दिएको प्रधानमन्त्रीको निजी सचिवालयले जनाएको छ । 
जसअनुसार कमल थापालाई उपप्रधानमन्त्री तथा उर्जा, दिलनाथ गिरीलाई शहरी विकास, विक्रमवहादुर थापालाई महिला बालबालिका तथा समाज कल्याण र जयन्त चन्दलाई आपुर्ति मन्त्रीको जिम्मेवारी दिइएको छ । प्रधानमन्त्री देउवाले यसअघि विज्ञान तथा प्रविधी मन्त्री रहेका दिपक बोहोरालाई स्वास्थ्य मन्त्रालयको जिम्मेवारी दिएका छन् । 
यस्तै यसअघि माओवादी केन्द्रले लिएको गृह, परराष्ट्र र सामान्य प्रशासन मन्त्रालय भने प्रधानमन्त्री देउवाले आफैसंग राखेका छन् । यसैगरी कुन्तिकुमारी शाहीलाई शहरी विकास राज्यमन्त्री, सुशिल श्रेष्ठलाई आपूर्ति, कान्ता भट्टराईलाई महिला बालबालिका तथा समाजकल्याण र भाष्कर भद्रालाई उर्जा आपूर्ति राज्य मन्त्रालयको जिम्मेवारी दिइएको प्रधानमन्त्रीको निजी सचिवालयले जनाएको छ ।