हेटौंडा-८ की वडा सचिव एमालेको चुनाव प्रचार प्रसारमा

१८ बैशाख, हेटौंडा । मकवानपुरमा आचारसंहिता उल्लंघनका घटना बढिरहेका छन् ।आचारसंहिता पूर्ण कार्यान्वयन गर्ने निर्वाचन आयोगको दावि विपरीत मकवानपुरमा सरकारी कर्मचारी नै एमालेको चुनावी अभियानमा हिडेको पाइएको छ । 
हेटौंडा वडा नम्बर ८ की वडा सचिव भगवती रिमाल खुलेआम एमालेको प्रचारप्रसारमा हिडेकी छिन्। उनी हेटौंडा-८ को एक कार्यक्रममा एमालेका उम्मेदवारसँग देखिएकी छिन्। 
आचारंसहिताले सरकारी कर्मचारीलाई दलका चुनावी गतिविधिमा सहभागी हुन रोक लगाएको छ। उनी भने मन्द मुस्कानका साथ अभियानमा रहँदा पनि निर्वाचन आयोग र जिल्ला प्रशासन कार्यालय मौन देखिएको गुनासो छ । ' यस्ता कर्मचारी भोलि मतदान र गणनामा खटिंदा निर्वाचनको निष्पक्षतामा प्रश्न उठ्ने सर्वसाधारणको भनाई छ । 
निर्वाचन आयोग मकवानपुरले हिजो जिल्ला प्रशासन कार्यालयमा छलफलको आयोजना गर्दै चुनावी आचार संहितको अवगत गराएको थियो। 
पछिल्लो समय सरकारी कर्मचारी, शिक्षक, अर्ध सरकारी कार्यालयका कर्मचारी र स्थानीय तहका कर्मचारी पनि चुनावी अभियानमा हिडिरहेका छन् ।उनीहरूलाई नियमन गर्न भने सम्बन्धित निकायले सकेको छैन।यस अघि हेटौंडाका सरकारी कार्यालयका लेखापाल नकुल गौतम नेकपा एमालेका उम्मेदवार र नेतासंग चुनावी अभियानमा देखिएका छन् भने हेटौंडाका मेयर हरि बहादुर महत आचार संहित विपरीत एमालेको प्रचारप्रसारमा पुगेका थिए।