एमालेको आमसभाले हुप्रचौर फोहर भएपछि सफा गर्न आग्रह

१९ बैशाख, हेटौंडा । नेकपा एमालेको आमसभापछि हेटौंडा–४ स्थित हुप्रचौर सरसफाइ नगरेको सर्वसाधारणले विरोध गरेका छन् ।
हुप्रचौरमा नगर विकास समितिले सार्वजनिक कार्यक्रम, मेला महोत्सव र आमसभा आयोजना गर्न रोक लगाएको भएपनि केही दिन अघि राप्रपा र आइतबार एमालेले आमसभा गरेका थिए ।
आइतबार एमालेका केन्द्रीय अध्यक्ष केपी शर्मा ओलीको प्रमुख आतिथ्यतामा गरिएको आमसभाका कारण हुप्रचौरमा फोहोर बनेको छ । हुप्रचौरमा आमसभापछि एमालेले फोहोर सरसफाइ र टेण्ट लगाउनका लागि पारिएको खाल्डो पुरेको छैन । 
‘हुप्रचौरमा आमसभाका लागि खाल्डाहरु पारिएको छ ।’ स्थानीयले गुनासो गर्दै भने-‘खाल्डा पुर्नेसँगै फोहोर पनि सरसफाइ गरेको छैन । जसका कारण हुप्र चौर एमालेकै कारण कुरुप बनेको छ । यसप्रति हामी स्थानीयबासी रुष्ट भएका छौं, सफा गरिदिन अनुरोध गर्दछौं ।’ 
निर्वाचनलक्षित कार्यक्रम गर्दा जनताले प्रयोग गर्ने सार्वजनिक स्थललाई कुरुप पार्नेले भोट माग्न लज्जित हुनुपर्ने बताएका छन् । एमालेले हुप्रचौरमा गरेको फोहोर र खाल्डो पारिएकोबारे तस्बिरहरू सार्वजनिक गर्दै सामाजिक संजालमा आलोचना भइरहेको छ । 
यता, मंगलबार खाल्डो पुर्ने र सरसफाइ गर्ने एमाले मकवानपुर अध्यक्ष एकालाल श्रेष्ठले बताए । कतै खाल्डो र केहि फोहोर हुनसक्छ । 'हामी मंगलबार सबै खाल्डो पुर्ने र सरसफाइ गर्नेछौं ।’ उनले भने ।
राजनीतिक दलले यस्ता विषयमा ध्यान दिनुपर्ने हुप्रचौरका स्थानीयको भनाइ छ ।