स्वास्थ्य शिक्षा र रोजगार, जीवनको आधार, यसलाई पूरा गर्छु : लामा

        २० बैशाख, हेटौंडा । स्थानीय तह निर्वाचनको गठबन्धनका मकवानपुरगढी गाउँपालिकाको अध्यक्ष पदका उम्मेदवार दोर्जे लामा स्याङ्तानले स्वास्थ्य शिक्षा र रोजगार जीवनको आधार भएकाले यसलाई पूरा गर्ने गरी काम गर्ने बताएका छन् ।
गढी-२ मा गठबन्धनको संयुक्त सभामा बोल्दै लामाले शैक्षिक सुधार, स्वास्थ्यमा सेवा वृद्धि, दैनिक जीवनमा आइपर्ने जीवनस्तरका कुरामा आफु सधैं जनतासामु भइरहने बताएका छन् । 
वडामा एक घर एक धाराको अवधारणा लागू गरिनुका साथै पशुपालन/कृषि क्षेत्रमा आधुनिकिकरण गरिने बताए । उनले महिला, बालबालिका तथा युवा लक्षित कार्यक्रम ल्याइ महिला उद्यमीका कार्यक्रम गरिने बताए । 
वडा नम्बर २ का वडा सभापति राम प्रसाद पुडासैनीको अध्यक्षता तथा माओवादी केन्द्रका जिल्ला सचिव भीम पाख्रिनको प्रमुख आतिथ्यतामा चुनावी सभा भएको थियो । 
 चुनावी सभा कार्यक्रममा उपाध्यक्ष पदका उम्मेदवार मानकुमारी पाख्रिन (नेपाली )ले जनताको भावना अनुरुप र गाउँपालिका बासीहरुको जनअपेक्षामा रहेर काम गर्ने बताइन् ।
कार्यक्रममा गठबन्धन चुनाव प्रचारप्रसार समितिका संयोजक यतिराज सापकोटा, माओवादी केन्द्रका वडा अध्यक्ष पदका उम्मेदवार जीत बहादुर लो, साङ्गे छोइलिङ बौद्ध गुम्बाका प्रमुख लामा जीत दोर्जे लामा लगायतले आफ्नो भनाइ राखेका थिए । 
चुनावी सभामा काङ्ग्रेसका महासमिति सदस्य सुवात सिं थिङ्, जिल्ला सदस्य राजकुमार गोले, पालिका सभापति राजविर मुक्तान, माओवादी केन्द्रका पालिका अध्यक्ष राजकुमार खड्का, वरिष्ठ उपाध्यक्ष युवराज सापकोटा लगायत गठबन्धनका विभिन्न भातृ संगठनका प्रतिनिधिहरुको आतिथ्यता रहेको थियो ।