एमालेले उपमहानगरपालिकालाई भ्रष्टाचारको अखडा बनायोः सिंह

२१ बैशाख, हेटौंडा । राप्रपाबाट हेटौंडाका मेयर पदका उम्मेदवार दिपकबहादुर सिंहले नेकपा एमालेले हेटौंडा उपमहानगरपालिकालाई भ्रष्टाचारको अखडा बनाएको बताएका छन् । चुनावी अभियान अन्तरगत हेटौंडा–६ चुच्चेखोलामा भएको कोणसभालाई सम्बोधन गर्दै उम्मेदवार सिंहले बर्षौदेखि हेटौंडामा एमालेलाई जनताले जिताएको बताउँदै एमालेले भ्रष्टाचारको अखडा बनाएको बताएका हुन् । 
उनले आफ्ना कार्यकर्तालाई भर्ति केन्द्र बनाउने र आसेपासेलाई आर्थिक लाभ गरेका काम मात्रै गरेको भन्दै आफु मेयर भए भ्रष्टाचार शुन्य बनाई दिने बताए । उनले आफुले सेवा सुविधा नलिई काम गर्ने बताउँदै आफु लिन नभई दिन मेयर पदको उम्मेदवार बनेको बताए । उनले एमालेबाट मेयर पदका उम्मेदवार अनन्त पौडेललाई जनताले सांसदसम्म बनाएपनि जनताका लागि केही नगरेको बताए । उनले आफुले जिते नगरको विकास गतिलाई तिब्र बनाएर महानगरको स्तरमा पुर्याउने दावी गरे । 
कार्यक्रममा उपमेयरकी उम्मेदवार इन्दिरा न्यौपाने, हेटौंडा–६ का वडा केदार राई लगायतको उपस्थिति रहेको थियो । राप्रपाले बुधबार पुतलीबजार, लाहुरेटोल, हात्तिलेट, रक्षादेवी टोल, कृष्णनगर, चुच्चेखोला, चुनडाँडा लगायतका क्षेत्रमा घरदैलो गरेको छ ।