हेटौंडा १७ मा गठबन्धन उम्मेदवार मतदाता शिक्षा व्यस्त

२४ बैशाख, हेटौंडा । हेटौंडा १७ मा गठबन्धनका उम्मेदवारहरूले मत माग्न घरदैलोसँगै मतदाता शिक्षालाई पनि जोड दिएका छन् । 
नेपाली कांग्रेस र नेकपा समाजवादीको संयुक्त निर्वाचन प्रचारप्रसार समितिले सहजकर्ता परिचालन गरी मतदाता शिक्षामा जोड दिएको हो । अघिल्लो पटक स्थानीय निर्वाचनका क्रममा अधिकांश मत बदर भएपछि यसपटक गठबन्धनका उम्मेदवारहरूले घरदैलो सँगसँगै मतदाता शिक्षा कार्यक्रमलाई पनि जोड दिएका हुन् । 
सहजकर्ताहरूले मतदाताका घरदैलोमा पुगेर बदर नहुने गरी भोट हाल्ने तरिकाका बारेमा मतदातालाई जानकारी गराउने नेपाली कांग्रेस १७ नम्बर वडा सभापति तथा वडा सदस्य उम्मेदवार समेत रहनुभएका नवराज न्यौपानेले बताए ।
यसैबीच दुईदलीय गठबन्धनले शुक्रबार वडाको विकट क्षेत्र साजबोटे, बुङ्गे, धियाले, सुकौरा लगायतका क्षेत्रमा घरदैलो कार्यक्रम सम्पन्न गरेको छ । वडा अध्यक्षका प्रत्यासी उद्धव सत्याल सहितको टोलीले चुरे क्षेत्रमा रहेका ती बस्तीहरूमा पुगी आफ्ना चुनावी प्रतिबद्धता मतदाता समक्ष व्यक्त गरेका छन् । 
संयुक्त गठबन्धनले सो क्षेत्रका बालबालिकाको माध्यमिक तहको अध्ययनको सुनिश्चितताका लागि वडाको बालबोध माविलाई आवासीय विद्यालयका रुपमा विकास गरी निःशुल्क आवासीय अध्ययन सुविधा उपलब्ध गराउने योजना तयार पारेको सत्यालको भनाई छ ।