मकवानपुरमा आचारसंहिताः कर्मचारीदेखि पत्रकारसम्मले उल्लंघन

२६ बैशाख, हेटौंडा । बैशाख ३० गते स्थानीय तहको निर्वाचनमा मकवानपुरमा आचारसंहिता उल्लंघनका घटना बढिरहेका छन् । निर्वाचन नजिकिंदा राजनैतिक दल चुनावी अभियानमा छन् भने उनीहरुको प्रचारको काममा आचारसंहिता उल्लंघनका घटना बढिरहेका हुन् । 
मकवानपुरमा आचारसंहिता उल्लंघन गर्नेमा दलका नेता, सरकारी कर्मचारी, शिक्षक, स्वास्थ्यकर्मी र सरकारी सेवा उपभोग गर्ने व्यक्तिदेखि पत्रकारसम्म रहेको पाईएको छ । निर्वाचन आयोगले जारी गरेको आचारसंहिता उल्लंघन गर्दै सबैभन्दा बढि सरकारी सेवा सुविधा लिने कर्मचारीहरु दलको प्रचारप्रसारमा हिडेको पाईएको छ । यसपटक पत्रकार पनि आचारसंहिता उल्लंघनमा देखिएका छन् ।
मकवानपुरमा आइतबारसम्म आचारसंहिता उल्लंघन गरेको भन्दै ३३ वटा उजुरी परेको मुख्य निर्वाचन अधिकृत डिल्लीरत्न श्रेष्ठले जानकारी दिए । मकवानपुरमा दैनिक ४–५ वटा आचारसंहिता उल्लंघनका उजुरी आउने गरेको र उनीहरुलाई प्रकृति अनुसार स्पष्टिकरण सोधिएको छ । निर्वाचनमा खटाईएका केही कर्मचारीलाई त आचारसंहिता उल्लंघन गरेको पाइएपछि स्पष्टिकरण लिंदै निर्वाचनबाट फिर्ता बोलाईएको छ । आचारसंहिता उल्लंघनमा विशेष गरी फेसबुकमा उम्मेदवारको प्रचार गर्ने, चुनावी अभियानका फोटो हाल्ने, आफु नै चुनावी अभियानमा संलग्न हुने, आफैंले प्रचार सामग्री बनाएर सामाजिक सञ्जालमा हाल्ने, चुनावी कार्यक्रममा भाषण गर्ने जस्ता गतिविधि भएको पाईएको छ । 
आचारसंहिता उल्लंघनको सूचना दिन संचारमाध्यमले बढि सहयोग गरेको मूख्य निर्वाचन अधिकृतको कार्यालयले जनाएको छ ।