परियार हत्याका दोषीलाई कानूनी दायरामा ल्याउन कांग्रेस बागमती प्रदेशको माग

२६ बैशाख, हेटौंडा । नेपाली कांग्रेस बागमती प्रदेश अधिवेशन प्रतिनिधि अनिल परियारको आइतबार राति अज्ञात समुहद्वारा भरतपुरमा धारिलो हतियार प्रयोग गरी भएको हत्याप्रति नेपाली कांग्रेस बागमती प्रदेश समितिले गम्भिर ध्यानाकर्षण भएको जनाएको छ । 
बागमती प्रदेश सभापति इन्द्रबहादुर बानियाँले आइतबार विज्ञप्ति जारी गर्दै यस्तो अपराधिक क्रियाकलापको प्रदेश समिति निन्दा गर्दै दोषिलाई कार्वाहीको माग गरेका हुन् । विज्ञप्तिमा ‘स्थानीय तह निर्वाचनको पूर्व सन्ध्यामा नेपाली कांग्रेसका जुझारु सदस्य परियारको हत्या हुनु लोकतन्त्र, आवधिक निर्वाचन, वाक स्वतन्त्रताप्रतिको प्रहार मात्र नभई वर्तमान गठवन्धनविरुद्ध समेत प्रहार भएको हाम्रो ठहर छ । नेपाली कांग्रेस र गठबन्धनलाई कमजोर बनाउन गरिएको यस्तो अपराधिक क्रियाकलापको प्रदेश समिति निन्दा गर्दछ ।’–भनिएको छ ।
नेपाली कांग्रेस बागमती प्रदेश समितिले यस्ता घटना दोहोरिन नदिन सुरक्षा निकाय चनाखो रहनुपर्नेतर्फ सचेत गराउँदै निर्वाध ढंगले चुनावी अभियान संचालन गर्दै भयरहित, स्वतन्त्र र निस्पक्ष ढंगले निर्वाचन सम्पन्न गर्ने वातावरणका लागि सम्बन्धित सबै पक्षसंग आग्रह समेत गरेको छ ।
नेपाली कांग्रेस बागमती प्रदेश समितिले दिवंगत आत्माप्रति हार्दिक श्रद्धाञ्जली व्यक्त गर्दै शोक सन्तप्त परिवारप्रति गहिरो समवेदना प्रकट गरेको छ ।