स्थानीय तह निर्वाचनः ३८९ स्थानको नतिजा सार्वजनिक, कांग्रेस सबैभन्दा अघि

४ जेठ, हेटौंडा । वैशाख ३० गते भएको स्थानीय तह निर्वाचनको देशभर भइरहेको मतगणना अनुसार अहिलेसम्म ३८९ स्थानको मत परिणाम सार्वजनिक भएको छ । 
७ सय ५१ स्थानीय तहका लागि भएको निर्वाचनमध्ये आज विहान ७ बजेसम्म नेपाली काँग्रेसले १८१ प्रमुख पदमा जित हात पारेको छ भने प्रमुख प्रतिपक्षी नेकपा एमालेले ११६ स्थानमा जीत हात पारेको छ । ८७ वटा नगरपालिका र तीन सय २ वटा गाउँपालिका गरी तीन सय ८९ वटा पालिकाको अन्तिम मत परिणाम सार्वजनिक भएको निर्वाचन आयोगले जनाएको छ ।
सार्वजनिक मत परिणाम अनुसार पहिलो स्थानमा रहेको नेपाली कांग्रेसले अहिलेसम्म ४८ वटा नगरपालिका र एक सय ३३ वटा गाउँपालिका गरी १८१ वटा पालिकाको प्रमुख पदमा जित हासिल गरेको छ ।
यस्तै कांग्रेसले ४१ वटा नगरपालिकाको उपमेयर, १३२ वटा गाउँपालिकाको उपाध्यक्ष गरी १७३ ठाउँमा उपप्रमुख तथा उपाध्यक्ष जितेको छ । नेपाली कांग्रेसले १ हजार ८ सय ४९ वटा वडाध्यक्ष पद जितेको छ ।
यता दोस्रो स्थानमा रहेको नेकपा एमालेले २५ वटा नगरपालिका र ८५ वटा गाउँपालिका गरी ११० वटा पालिकाको प्रमुख पद जितेको छ । यस्तै एमालेले २८ वटा नगरपालिकाको उपमेयर र ८२ वटा पालिकाको उपाध्यक्ष गरी ११० ठाउँमा नै पालिका उपप्रमुख÷उपाध्यक्ष जितेको छ । एमालेले एक हजार ४ सय ४७ वटा वडाध्यक्ष पदमा जित हासिल गरको छ ।
तेस्रो स्थानमा रहेको माओवादी केन्द्रले अहिलेसम्म नगरपालिका र गाउँपालिकाको प्रमुख र अध्यक्ष गरी ८० वटा पालिकाको प्रमुख पद जितेको छ । यस्तै माओवादीले १३ वटा नगरपालिकाको उपमेयर, ७१ वटा गाउँपालिकाको उपाध्यक्ष गरी ८४ ठाउँमा जितेको छ । माओवादीले सात सय ८३ वटा वडाध्यक्ष पदमा जित निकालेको छ ।
नेकपा एकीकृत समाजवादीले एउटा नगरपालिका मेयर, चार वटा गाउँपालिकामा अध्यक्ष, तीन वटा नगरपालिकाको उपमेयर र ९ वटा गाउँपालिकाको उपाध्यक्ष जितेको छ । जनता समाजवादी पार्टीले पनि ५ वटा गाउँपालिकाको अध्यक्ष पदमा जित निकालेको छ । 
जनता समाजवादी पार्टीले ५ र अन्य तर्फका १ जनाले प्रमुख पदमा जित हात पारेका छन् । यस्तै उप प्रमुख उपाध्यक्षमा नेपाली काँग्रेसले ४५, एमालेले ३३, माओवादी केन्द्रले १६, एकीकृत समाजवादीले ५ र जसपाले १ स्थानमा जित हात पारेको छ । 
देशभरका प्रमुख र अध्यक्षमा काँग्रेसले अग्रता कायमै राखेको छ । अहिलेसम्म नेपाली कांग्रेस १३१ स्थानमा प्रमुख तथा अध्यक्ष र ११२ स्थानमा उपप्रमुख तथा उपाध्यक्ष पदमा अगाडी देखिएको छ । यस्तै एमालेले भने प्रमुख र अध्यक्षमा ८६ तथा उपप्रमुख र उपाध्यक्षमा १११ स्थानमा अग्रता बनाएको छ ।
यसैगरी माओवाद केन्द्रले प्रमुख र अध्यक्षमा ३७ तथा उपप्रमुख र उपाध्यक्षमा ४४ स्थानमा अग्रता बनाएको छ । यस्तै एकिकृत समाजवादीले प्रमुख र अध्यक्षमा १५ तथा उपप्रमुख र उपाध्यक्षमा १० स्थनाम अग्रता बनाएको छ ।