मकवानपुर गोल्डकपको तयारी अन्तिम चरणमा, उद्घाटनमा बागमती र नवजनजागृति क्लब भिड्ने 

१७जेठ, हेटौंडा । हेटौंडामा हुने स्थानीय तह सहीद स्मृति अन्तर्राष्ट्रिय मकवानपुर गोल्डकप प्रतियोगिता २०७९ को उद्घाटन खेलमा बागमती र नवजनजागृत क्लब भिड्न भएका छन् ।
मकवानपुर फुटबल संघको आयोजनामा यही जेठ १९ गतेबाट हुने प्रतियोगिताको बारेमा जानकारी दिँदै आयोजकले प्रतियोगिताको ड्र सार्वजनिक गरेको हो । प्रतियोगिताको तयारी अन्तिम चरणमा पुगेको जानकारी समेत गराइएको छ ।
हेटौंडा–५ स्थित पिप्ले–क्याम्पा रंगशालामा हुने प्रतियोगितामा विभागीय क्लबहरु नेपाल आर्मी क्लब, नेपाल पुलिस क्लब, सशस्त्र प्रहरीको (एपीएफ) क्लब, मनाङ मस्र्याङ्दी क्लब, फ्रेण्डस्, खुमलटार युथ क्लब, सिमरा, सर्लाहीको बागमती युवा क्लब, विजय युथ क्लब हेटौंडा, चितवन–११, चर्च ब्वाइज क्लब र क्यामरुनको एभिनियर एफसी सहभागीता जनाउँने छन् ।
जेठ ३० गतेसम्म सञ्चालन हुने प्रतियोगितामा १२ वटा क्लबले सहभागिता जनाउने छन् । यस्तै प्रतियोगिताको विजेताले १५ लाख र उपविजेताले १० लाख रुपैयाँसहित ट्रफी प्राप्त गर्नेछन् । अघिल्लो बर्षको भन्दा यस बर्ष पुरस्कारर राशी बृद्धि गरिएको छ । अघिल्लो बर्ष विजेताले १० र उपविजेताले ५ लाख रुपैयाँ प्राप्त गरेका थिए । 
प्रतियोगिताको उत्कृष्ट गोलरक्षक, डिफेन्डर, मिडफिल्डर, फरवार्ड, सर्वाधिक गोलकर्ता तथा उत्कृष्ट प्रशिक्षकलाई जनही २५ हजार रुपैयाँ तथा प्रत्येक खेलको म्यान अफ द म्याचलाई नगद १० हजार रुपैयाँसहित ट्रफी प्रदान गरिनेछ । प्रतियोगिताको सर्वोत्कृष्ट खेलाडलाई बुलेट मोटरसाइकल प्रदान गरिने प्रतियोगिता संयोजक प्रताप विष्टले जानकारी दिए । 
एक करोड १७ लाख ९२ हजार रुपैयाँ कुल खर्च अनुमान गरिएको प्रतियोगितामा दर्शकका लागी पहिलो चरणको खेल हेर्न १ सय रुपैयाँ, सेमिफाइनलमा २ सय रुपैयाँ र फाइनल खेलमा २५० रुपैयाँ टिकट मूल्य निर्धारण गरिएको छ ।