मउवासंघमा राउतद्वारा उम्मेदवारी घोषणा

१२ कार्तिक, हेटौँडा । मकवानपुर उद्योग बाणिज्य संघको अध्यक्षमा वर्तमान महासचिव महेन्द्र राउतले उम्मेदवारी दिने घोषणा गरेका छन् । 
संचारकर्मीहरुसँग हेटौँडामा आइतबार आफ्नो कार्यकालको समिक्षा र भावी रणनीतिबारे जानकारी गराउँदै राउतले अध्यक्षमा उम्मेदवारीको घोषणा गरेका हुन् । राउत पत्रकार सम्मेलन नै गरेर अध्यक्षको उम्मेदवारी घोषणा गर्ने पहिलो हुन् । उनले व्यवसायीहरुलाई अत्यावश्यक पर्ने व्यवसायिक योजना तयार, कर प्रणालीका नीतिगत प्रावधान बारे पर्याप्त जानकारी नहुँदा समस्या देखिने गरेको भन्दै यसतर्फ पनि आफुले काम गर्ने बताए । 
हेटौँडालाई आर्थिक जिल्ला बनाउन राज्य तहसम्म पहल गर्ने र उद्योग व्यवसाय विस्तारका लागि काम गर्ने बताए । आफ्नो वर्तमान कार्यकालमा संघले विस्तृत परियोजना प्रतिवेदन तयार गरेको बहुप्रायोगिक अत्याधुनिक व्यवसायिक भवन निर्माणको काम अघि बढाउने, मकवानपुरमा पर्यटन प्रवद्र्धनका लागि व्यवसायीहरुलाई प्रोत्साहन र सहजिकरण गर्ने समेत प्रतिवद्धता व्यक्त गरे । 
आन्तरिक राजस्व कार्यालय मकवानपुरमा संघले राखेको हेल्पडेस्कलाई व्यवस्थित गर्ने, उद्योगी, श्रमिक र क्रियाशिल ट्रेड युनियनबीच सुमधुर सम्बन्ध कायम गर्नेतर्फ आफ्नो अग्रसरता रहने समेत उनको भनाई छ । आफुले अहिले एक्लै उम्मेदवारी घोषणा गरेको बताउँदै व्यवसायिक हितमा लाग्ने साथीहरुको टिम बनाउने पनि बताए । केन्द्रीय सदस्य एवं वर्तमान अध्यक्ष राजकुमार न्यौपानेको सकारात्मक काममा सधै साथ दिएको भन्दै उनले आफ्नो उम्मेदवारीमा पनि न्यौपानेबाट सहयोग हुने विश्वास व्यक्त गरे । 
संघको सदस्य, सचिव र महासचिवको भुमिका निर्वाह गरेका राउतसंगै अन्य तीन जनाले पनि संघको अध्यक्षमा उम्मेदवारी दिने जनाएका छन् । नेपाल उद्योग बाणिज्य महासंघका केन्द्रीय सदस्य एवं मकवानपुर उद्योग बाणिज्य संघका अध्यक्ष राजकुमार न्यौपाने, बरिष्ठ उपाध्यक्ष कृष्ण कटुवाल र उपाध्यक्ष कृष्ण अग्रवालले पनि उम्मेदवारी दिने तयारी गरेका छन् । आगामी साधारण सभा पुस २७, २८ र २९ गते हेटौँडामा हुने संघले जनाएको छ ।