सामाजवाद उन्मुख अर्थतन्त्र निर्माण हुनेगरि काम गर्न मुख्यमन्त्री पाण्डेको आग्रह

३० जेठ, हेटौंडा । बागमती प्रदेशका मुख्यमन्त्री राजेन्द्रप्रसाद पाण्डेले संविधानमा उल्लेख गरिएको समाजवाद उन्मुख अर्थतन्त्र निर्माण हुने गरी काम गर्न प्रदेश अन्तरगतका स्थानीय तहहरुलाई आग्रह गरेका छन् ।
बागमती प्रदेशका ११९ वटा स्थानीय तहका प्रमुख र उपप्रमुखका लागि आज सोमबार र भोली मंगलबार गरि दुईदिनसम्म हेटौंडामा चल्ने  अभिमुखीकरण कार्यक्रमको उद्घाटन गर्दै उनले यस्तो बताएका हुन् । 
उनले प्रदेश सरकारले गरिव तथा सामाजिक विभेदमा परेकाहरुको उत्थान हुने खालको नीति तथा कार्यक्रम ल्याएको उल्लेख गर्दै त्यसैसँग जोडेर बजेट ल्याउन पनि स्थानीय तहहरुलाई आग्रह गरे ।
उनले एकल महिला, दलित, लोपोन्मुख, सिमान्तकृत समूदाय, अपांगता भएका महिलाहरुको सशक्तिकरणका लागि सीप, पूँजी र प्रविधिको उपयोग गरिने कुरालाई स्थानीय सरकारले पनि विशेष रुपले अघि बढाउनुपर्नेमा मुख्यमन्त्री पाण्डेले जोड दिए । 
मुख्यमन्त्री पाण्डेले स्थानीय तहमा डोजरे विकास मौलाएकोभन्दै चिन्ता व्यक्त गरे । उनले जनप्रतिनिधिलाई डोजरे विकासबाट बाहिर निस्किन पनि आग्रह गरे । मुख्यमन्त्री पाण्डेल असार १० गते स्थानीय तहले ल्याउने बजेटमा प्रदेशको नीति तथा कार्यक्रममा समावेश भएका योजनाहरुलाई समेत समेट्न आग्रह गरे ।