आज विनियोजन विधयेक पारित गर्ने सरकारको तयारी

१ असार, हेटौंडा । सरकारले विनियोजन विधयेक, २०७९ पारित गर्ने तयारी गरेको छ । आज बिहान ११ बजेका लागि बोलाइएको प्रतिनिधि सभाको बैठकमा अर्थमन्त्री जनार्दन शर्माले विनियोजन विधयेक, २०७९ पारितको लागि प्रस्ताव प्रस्तुत गर्ने कार्यसूची रहेको संसद् सचिवालयले जनाएको छ । 
यस्तै आजको बैठकले आर्थिक विधेयक, २०७९ माथि दफावार छलफलको लागि दिन तोक्ने कार्यसूची रहेकोसंघीय संसदको महासचिव डा. भरतराज गौतमले जानकारी दिनुभयो । उहाँका अनुसार त्यसअघि मन्त्री शर्माले आर्थिक विधेयक, २०७९ माथि विचार गरियोस् भन्ने प्रस्ताव संसद्मा प्रस्तुत गर्नेछन् । यस्तै मन्त्री शर्माले राष्ट्र ऋण उठाउने विधेयक, २०७९ र ऋण तथा जमानत (पच्चीसौं संशोधन) विधयेक, २०७९ माथि विचार गरियोस् भन्ने प्रस्ताव पनि संसद्मा प्रस्तुत गर्नेछन् । 
आजको बैठकमा पनि विभिन्न मन्त्रीले आफ्नो मन्त्रालयको शीर्षकहरूमाथिको छलफलमा उठको प्रश्नहरुको जवाफ दिने तथा सांसद्हरूले गरेको खर्च कटौतीको प्रस्ताव संसदमा प्रस्तुत गर्ने कार्यसूची रहेको सचिवालयले जनाएको छ । तर प्रमुख प्रतिपक्षी नेकपा एमालेले बजेट निर्माणमा अनधिकृत व्यक्तिले हस्तक्षेप गरेको भन्दै संसदीय छानबिन समिति गठन नभएसम्म बैठक चल्न नदिने बताएको छ ।
हिजोको बैठकमा एमालेका प्रमुख सचेतक विशाल भट्टराईले बजेट निर्माणमा भएको लापरवाहीबारे संसदीय छानबिन समिति गठन नहुँदासम्म सदन चल्न नसक्ने बताएका थिए ।