मुलुकको सार्वभौमकिता प्रतिकुल हुने सम्झौता गर्दिनः प्रधानमन्त्री देउवा 

file photo

२ असार, हेटौंडा । प्रधानमन्त्री शेरबहादुर देउवाले अमेरिका भ्रमणको क्रममा मुलुकको सार्वभौमकितामाथि प्रश्न उठ्ने गरी सरकारले कुनैपनि सम्झौता नगर्ने प्रष्ट पारेका छन् ।
अमेरिकासँग हुने भनिएको स्टेट पार्टनरसीप प्रोगाम (एसपीपी) बारे आलोचना बढेपछि प्रधानमन्त्री देउवाले आज सत्तारुढ गठबन्धनका शीर्ष नेताहरूसँग छलफल गरेका हुन् ।
प्रधानमन्त्रीको सरकारी निवास बालुवाटारमा बुधबार नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवसँग भएको छलफलको क्रममा प्रधानमन्त्री देउवाले एसपीपी सम्झौताबारे सार्वजनिक भएका तथ्यहरूमा सत्यता नभएको दावी गरे । 
उनले आफ्नो अमेरिका भ्रमणका बेला मुलुकको हित विपरित कुनै पनि किसिमका सम्झौता नगर्ने प्रतिवद्धता पनि व्यक्त गरे । भेटको क्रममा उनले २०१५ मै अमेरिकाले प्रस्ताव गरेको कार्यक्रमबारे अहिले सुनियोजित विवाद झिकिएको उल्लेख गरे । प्रधानमन्त्री देउवाले अमेरिकाले एसपीपी सम्झौता गर्न कुनै दवाव नदिएको पनि बताए । 
भेटको क्रममा अध्यक्ष प्रचण्ड र नेपालले सम्झौताबारे प्रश्न उठेको र यथास्थितिमा सम्झौता नगर्नु उपयुक्त हुने सुझाव दिएका थिए ।