हेटौंडाको बजेट २ अर्ब ७१ करोड ७९ लाख ७२ हजार

१२ असार,हेटौंडा। हेटौँडा उपमहानगरपालिकाले आर्थिक वर्ष २०७९/०८० को लागि २ अर्ब ७१ करोड ७९ लाख ७२ हजार रूपैयाको बजेट प्रस्तुत गरेको छ ।
उपमहानगरको एघारौं नगरसभामा उपप्रमुख राजेश बानियाँले आर्थिक वर्ष २०७९/०८०को लागि नीति तथा कार्यक्रम कार्यान्वयनका लागि लागि २ अर्ब ७१ करोड ७९ लाख ७२ हजार  रूपैयाको बजेट प्रस्तुत गरेका हुन् ।बजेटमा कार्यालय तथा प्रशासनिक खर्चतर्फ ३३ करोड ५७ लाख ८९ हजार बजेट विनियोजन भएको छ। सामजिक विकास तर्फ ८३ करोड ६७ लाख १७ हजार, पूर्वाधार विकास तर्फ १ अर्ब ८ करोड ४२ लाख रुपैँया विनियोजन गरिएको हो। बजेट प्रस्तुतिका क्रममा उपमेयर राजेश बानियाँका अनुसार सीमान्तकृत तथा गरिव १५४१ घरपरिवारको स्वास्थ्य वीमाका लागि ५३ लाख रुपैयाँ विनियोजित गरिएको छ । 
त्यसैगरी वन तथा वातावरण तर्फ १२ करोड ६ लाख ८० हजार र शुसासन तथा सस्थागत विकास तर्फ ७ करोड ३३ लाख ५० हजार रुपैँया बजेट विनियोजन भएको छ । विविध कोष तर्फ ९९ लाख तथा बागमती प्रदेशबाट हस्तान्तरण भएका आयोजनाको लागि ६ करोड ३ लाख ७० हजार रुपैँया विनियोजन भएको छ ।
उपमहानगरपालिकाले सिसिटिभी मर्मत तथा सुधारका लागि ४० लाख रुपैयाँ बिनियोजन गरेको छ । वातावरण तथा बिपद् व्यावस्थापनका लागि १२ करोड ६ लाख रुपैयाँ बिनियोजन गरिएको छ।महिला, बालबालिका, सामाजिक बिकास क्षेत्रका लागि ८३ करोड ६७ लाख रुपैयाँ विनियोजन गरिएको छ । त्यसैगरी युवा तथा खेलकुदका क्षेत्रमा ३ करोड ७३ लाख रुपैयाँ छुट्याइएको छ। यता हेटौंडा -५ मा रहेको पिप्ले क्याम्पा रङ्गशालाको पुर्वाधार विकासका लागि २५ लाख र हेटौंडामै अर्को मिनि रङ्गशालाका निर्माणका लागि ८० लाख विनियोजन गरिएको छ। एमाले जनप्रतिनिधिले अवरोध गरेको १० गतेको निति तथा कार्यक्रममा आज सहमति भएसँगै उपमहानगरले आगामी आर्थिक वर्षको नीति तथा कार्यक्रम प्रस्तुत गरेको हो।