एजेण्डा मिल्ने पार्टीसंग गठबन्धन जरुरीः उपसभापति खड्का

५ साउन, हेटौंडा । नेपाली कांग्रेसका केन्द्रीय उपसभापति पूर्णबहादुर खड्काले प्रतिनिधि तथा प्रदेशसभा निर्वाचनमा एजेण्डा मिल्ने पार्टीलाई कांग्रेसले संगै लिएर जाने बताएका छन् । स्थानीय निर्वाचनमा कांग्रेस मकवानपुरबाट निर्वाचित जनप्रतिनिधिको सम्मानका लागि बुधबार हेटौंडामा आयोजना गरेको बधाई तथा अभिमुखिकरण कार्यक्रममा उनले यस्तो बताएका हुन् ।
उनले अधिनायकवाद, संविधान र लोकतन्त्र बिरोधी गतिविधि गर्नेका विरुद्ध गठबन्धन भएको स्मरण गर्दै अझैपनि अधिनायकवाद, संविधान र लोकतन्त्र विरोधीले टाउको उठाउँन सक्ने भन्दै त्यसको विरुछ गठबन्धन आवस्यक रहेको दावी गरे । उपसभापति खड्काले १२ बुँदे शान्ति सम्झौता पूरा नभएको उल्लेख गर्दै शान्ति सम्झौतालाई पूर्णता दिन पनि माओवादीलाई साथमा लिनुपर्ने बताए ।
कांग्रेसबाट निर्वाचित जनप्रतिनिधिलाई उनले जनताले सम्झने र जनताको मनमा लोभ जगाउने गरी काम गर्न निर्देशन दिए । पार्टीबाट जितेर गएका जनप्रतिनिधिले पार्टी संग समन्वय गर्न भुल्न नहुने उनको सुझाव थियो । स्वतन्त्र उम्मेदवारले जित्नु जनताले राजनीतिक दललाई सुध्रिनका लागि संकेत भएको उनको भनाई थियो ।    
यस्तै कांग्रेस केन्द्रीय सहमहामन्त्री महालक्ष्मी उपाध्याय ‘डीना’ले अबको निर्वाचनमा प्रत्यक्षमै कम्तिमा एकतिहाइ महिला उम्मेदवार हुनुपर्ने दावी गरिन् । कांग्रेस बागमती प्रदेश सभापति इन्द्रबहादुर बानियाँले गठबन्धनको विरोध गर्नेहरु कांग्रेस हुनै नसक्ने धारणा राखे । गठबन्धनकै कारण मकवानपुरमा कांग्रेस पहिलो पार्टी बनेको उनको दावी थियो । 
कांग्रेस मकवानपुर सभापति बुद्ध लामाको अध्यक्षतामा भएको कार्यक्रममा कांग्रेसबाट स्थानीय तहको निर्वाचनबाट निर्वाचित जनप्रतिनिधिलाई सम्मान गरिएको थियो ।