भुकम्प पीडित अनुदान पारदर्शी वितरणको माग

७ भदौ, हेटौँडा । नयाँ शक्ति पार्टी नेपाल मकवानपुरले भुकम्प पीडितका लागि पुर्ननिर्माण अनुदान यथाशिघ्र पारदर्शी ढंगबाट वितरण गर्न माग गरेको छ । नयाँ शक्तिले २०७२ बैशाख १२ र २९ गते गएको भुकम्पका कारण घरबारविहिन हुन पुगेका पीडितलाई अनुदान वितरणमा ढिलाई भएको भन्दै ध्यानाकर्षण गराएको हो ।
मंगलबार मकवानपुरका प्रमुख जिल्ला अधिकारी मानबहादुर विकलाई ज्ञापनपत्र बुझाउँदै जिल्ला संयोजक प्रल्हाद लामिछानेले भुकम्प गएको १६ महिना वितिसक्दा पनि पीडितले आवश्यक सहयोग नपाएको भन्दै आपत्ति जनाएका छन् । ज्ञापनपत्रमा एकातिर बास्तविक पीडितले राहत पाउन ढिलाई भईरहेको र अर्कोतर्फ बास्तविक पीडितको नाम छुट्नुले सरकारप्रति गुनासो र आक्रोश बढाएको जनाईएको छ । नयाँ शक्तिले छुटेका भुकम्प पीडितहरुको नाम समेत समावेश गराई पारदर्शी ढंगबाट अनुदान वितरणका लागि अनुरोध गरेको छ । 
ज्ञापनपत्र बुझ्दै प्रजिअ विकले मकवानपुरमा अनुदान वितरणको प्रक्रिया अघि बढेको भन्दै नीतिगत समस्यालाई समाधान गर्दै निरन्तर काम भईरहेको बताए । उनले प्रधानमन्त्री पुष्पकमल दाहालले ४५ दिनभित्र पहिलो किस्ता रकम वितरण गर्न दिएको निर्देशन अनुसार नै काम अघि बढेको भन्दै स्थानीय तहमा देखिएका समस्या समाधानको काम पनि भईरहेको बताए । छुटेका भुकम्प पीडितका निवेदन सुनुवाईको पनि भईरहेको जानकारी दिंदै विवाद नरहेका पीडितलाई राहत वितरण गर्ने र विवाद रहेका विषयलाई पनि सम्बोधन गर्दै लैजानेतर्फ मकवानपुर प्रशासनले पहल गरिरहेको उनको भनाई थियो । जिल्ला प्रशासन कार्यालयमा ज्ञापन पत्र बुझाउन जिल्लाका नेता एवं कार्यकर्ताहरु पुगेका थिए ।