हेटौंडा-फापरबारीको भाडा अब प्रति किमी ३ रुपैंया ७२ पैसा

२९ साउन,हेटौंडा। अब धरान चतारा सडकखण्ड अन्तर्गत हेटौंडा, फापरबारी हदै बागमती सम्म बढी भाडा लिन नपाइने भएको छ। हेटौँडा हुदै सिन्धुली सम्म चल्ने सवारीले प्रतिकिलोमिटर ४ रुपैया ५० पैसा भाडा तिर्नु बाध्य रहेका थिए। 
आइतबार मकवानपुर जिल्लाभित्र रहेका मार्गहरू (पक्की, कच्ची, ग्राभेल) मा सञ्चालन हुने सवारी साधनहरूको लागि अस्थायी बाटो तथा भाडा निर्धारण गर्ने मकवानपुरका प्रमुख जिल्ला अधिकारी राजेन्द्र देव पाण्डेको अध्यक्षतामा सरोकारवालाहरूसँगको बैठकले  सो भाडा निर्धारण गरेको हो ।

सरोकारवालाको बैठकले धरान चतरा सडकखण्ड अन्तर्गत हेटौडा-फापरबारी-बागमती सडक खण्डको भाडादर अर्को व्यवस्था नभएसम्मका लागि प्रतिव्यक्ति प्रति किलोमिटर रु ३.७२ कायम गरिएको मकवानपुरका प्रजिअ राजेन्द्र देव पाण्डेले प्रष्ट खबरलाई बताए। 
मकवानपुर जिल्लाभित्रका विभिन्न मार्गहरूमा सञ्चालन हुने सवारी साधनहरूको लागि अस्थायी बाटो तथा भाडा निर्धारण सिफारिसको लागि श्रम, रोजगार तथा यातायात मन्त्रालय, बागमती प्रदेश, हेटौडाका प्रशासन, योजना तथा अनुगमन महाशाखाका प्रमुख  हरिहर पोख्रेलको संयोजकत्वमा ६ सदस्यिय समिति समेत गठन गरिएको समेत बताइएको छ ।