दृष्टिविहिन नेपाली राष्ट्रिय क्रिकेट टोलीको हेटौंडाबाट विदाई

१५ मंसिर, हेटौंडा । आगामी डिसेम्बर ६ देखि १७ सम्म भारतमा हुने दृष्टिविहिनहरुको टि–२० विश्वकप क्रिकेट प्रतियोगितामा सहभागी हुने नेपाली राष्ट्रिय टोलीलाई बुधबार हेटौंडाबाट विदाई गरिएको छ । 
बागमती प्रदेशको राजधानी हेटौंडामा बन्द प्रशिक्षणमा रहेको नेपाली राष्ट्रिय क्रिकेट टोलीलाई बुधबार जिल्ला खेलकुद विकास समिति मकवानपुरले एक औपचारिक कार्यक्रमको आयोजना गरि बिदाई गरेको हो । 
नेपाली राष्ट्रिय क्रिकेट टोली मंसिर १ गतेदेखि दुईहप्तासम्म हेटौंडामा बन्द प्रशिक्षणमा रहेको जिल्ला खेलकुद विकास समिति मकवानपुरका अध्यक्ष वेश खड्गीले जानकारी दिए । नेपाली राष्ट्रिय टोलीको बन्द प्रशिक्षणका लागी मकवानपुर क्रिकेट संघले मैदान उपलब्ध गराएको थियो । पाल्पाका खिमानन्द गैरेको नेतृत्वमा रहेको १५ सदस्यीय क्रिकेट टोलीलाई प्रशिक्षक नहेन्द्र निरौलाले प्रशिक्षण दिएका थिए । 
नेपाली क्रिकेट टोली डिसेम्बर ४ मा भारत प्रस्थान गर्ने र प्रतियोगिता भने डिसेम्बर ६ बाट हुने प्रशिक्षक निरौलाले जानकारी दिए । नेपाल र भारतसहित प्रतियोगितामा पाकिस्तान, अष्ट्रेलिया, दक्षिण अफ्रिका, बंगलादेश र श्रीलंका सहभागी हुने प्रशिक्षक निरौलाले बताए ।
१५ सदस्यीय नेपाली टोलीमा कप्तान गैरेसहित कास्कीका सुनिल राना, प्रेम क्षेत्री युवराज भण्डारी र काभ्रेका सन्त पहरी (बी–२) बल देख्न सक्ने खेलाडीको रुपमा सहभागी छन् भने बर्दियाका नरेश चौधरी, रुपन्देहीका शंकर रेग्मी, नुवाकोटका सुरेन्द्र तामा, रुपन्देहीका खेमराज सापकोटा र चितवनका सागर चेपाङ (बी–३) कमजोर दृष्टि भएको खेलाडीको रुपमा सहभागी छन् । 
यस्तै टोलीमा ललितपुरका सागर लामा, जुम्लाका भरत चौलागाई, कन्चनपुरका हिम खत्री, बर्दियाका राधेश्याम चौधरी, पाल्पाका तमबहादुर फाल भने पूर्ण दृष्टिविहिन खेलाडी (बी–१) को रुपमा सहभागी हुने प्रशिक्षक निरौलाले बताए ।