लक्ष्मीमाया बज्राचार्य स्मृति भलिबलको उपाधि आग्राले जित्यो

३ पुष, हेटौंडा । शनिवार हेटौंडामा सम्पन्न भएको २० औं संस्करणको लक्ष्मीमाया बज्राचार्य स्मृति जिल्लास्तरीय भलिबल प्रतियोगिताको उपाधि आग्रा स्पोर्टस् क्लवले जितेको छ । 
बसामाडी जेसीजको आयोजनामा भएको प्रतियोगिताको फाइनल खेलमा विनयबाबु स्मृति प्रतिष्ठान थाहा नगरलाई सोझो सेटमा हराउँदै आग्राले उपाधि जितेको हो । आग्राले विनयबाबु प्रतिष्ठानलाई २५–२०, २६–२४, २६–२४ को सेटमा हराएको हो । 
सेमीफाइनलमा आग्राले आमभञ्ज्याङ युवा क्लवलाई र विनयबाबु प्रतिष्ठानले बज्रबाराहीलाई हराउँदै उपाधि भिडन्त पक्का गरेको थियो । उपाधि विजेता आग्राले ६५ हजार प्राप्त गर्दा उपविजेता विनयबाबु प्रतिष्ठानले ३० हजार रुपैयाँ सहित ट्रफी, मेडल र प्रमाणपत्र प्राप्त गरेको छ ।

यसैगरी प्रतियोगिताको विधागत उत्कृष्ट खेलाडीको पुरस्कार आग्राले नै पायो । उत्कृष्ट खेलाडी पुजन गुरुङ, उत्कृष्ट स्पाइकर रमेश थिङ र उत्कृष्ट सेटर सञ्जय थिङ भए । यस्तै अनुशासित टिमको पुरस्कार बज्रबाराही युवा क्लवले पाएका छन् ।
विजेता तथा उत्कृष्ट खेलाडीहरुलाई बागमती प्रदेशका प्रदेशसभा सदस्य प्रेमबहादुर पुलामी छिन्तु, पूर्व अन्तर्राष्ट्रिय भलिबल खेलाडी चुडाकुमारी खड्का, आयोजक बसामाडी जेसीजका अध्यक्ष चिराग अग्रवाल लगायतले पुरस्कार वितरण गरेका थिए ।