बैंकको चर्को व्याजदर विरुद्ध व्यवसायी आन्दोलित

१७ पुस, हेटौंडा । बैंकहरुले चर्को व्याज लिइरहेको भन्दै मकवानपुरका व्यवसायीहरुले तत्काल बैंकको व्याज नियन्त्रण गर्नुपर्ने माग गर्दै आइतबार नेपाल सरकारका अर्थमन्त्री र नेपाल राष्ट्र बैंकका गभर्नरलाई ज्ञापनपत्र बुझाएका छन् ।
मकवानपुर उद्योग वाणिज्य संघको अगुवाईमा व्यवसायीहरुले आइतबार मकवानपुरका प्रमुख जिल्ला अधिकारी राजेन्द्रदेव पाण्डे मार्फत अर्थमन्त्री र गभर्नरलाई ज्ञापनपत्र बुझाएका हुन् । 
देशकै अर्थतन्त्र असहज अवस्थामा रहेको बेला बैंकहरुले व्यावसायीहरुसँग चर्को व्याज असुली रहेको र ऋण तिर्न दवाव दिने गरेको भन्दै उनीहरुले आइतबार आन्दोलनको कार्यक्रम समेत सार्वजनिक गरेका छन् ।
उनीहरुले प्रमुख जिल्ला अधिकारीलाई ज्ञापनपत्र बुझाउनुअघि पत्रकार सम्मेलनगरि आन्दोलनका कार्यक्रम घोषणा गरेका हुन् । घोषित कार्यक्रम अनुसार सोमबार जिल्लामा रहेका विभिन्न पाँचवटा संघमा आवद्ध व्यवसायीहरुले व्यानर राखी विरोध गर्ने, १९ गते मंगलबार आम व्यवसायीहरुले कालो पट्टी बाँधेर विरोध जनाउने र २० गते मागहरु सम्बोधन नभएको खण्डमा सशक्त आन्दोलनको तयारी गर्ने बताएका छन् ।
आन्दोलनमा मकवानपुर उद्योग वाणिज्य संघसँगै उद्योग संघ मकवानपुर, नारायणी यातायात व्यवसायी संघ, निर्माण व्यवसायी संघ मकवानपुर, होटल एशोसिएसन मकवानपुर आवद्ध रहेका छन् ।