मकवानपुर गोल्डकपको तयारी पुरा

२७ माघ, हेटौंडा । यही माघ २८ गतेबाट हेटौंडामा आयोजना हुने पाँचौ संस्करणको स्थानीय तह सहीद स्मृति मकवानपुर गोल्डकप फुटबल प्रतियोगिता २०७९ को तयारी पूरा भएको आयोजक जिल्ला फुटबल संघ मकवानपुरले जनाएको छ । 
हेटौंडा ५ पिप्लेस्थित पिप्ले–क्याम्पा रंगशालामा हुने प्रतियोगिताको बारेमा बताउँदै दिदैँ संघका अध्यक्ष टिकाराम लामो प्रतियोगिताको सम्पूर्ण तयारी पुरा भएको जानकारी दिए । उनले यसपटक प्रतियोगितामा स्थानीइ टिम मकवानपुर ११ सहित ७ वटा ‘ए’ डिभिजन क्लब, एउटा विदेशी टिम र ३ वटा मोफसलका टिमहरुको सहभागिता रहने बताए ।
प्रतियोगितामा स्थानीय टिम मकवानपुर ११ सहित त्रिभुवन आर्मी फुटबल क्लव, नेपाल एपिएफ क्लव, सातदोबाटो क्लव, मनाङ मस्र्याङ्दी क्लव, फ्रेण्ड्स क्लव, हिमालयन् शेर्पा क्लव, एनआरटी क्लव, बागमती युवा क्लव सर्लाही, बीरगञ्ज युनाइटेड, नव जनजागृति क्लव सिमरा र एभिनियर एफसी क्यामरुनको सहभगिता रहने छ ।
मकवानपुरका १० वटा स्थानीय तहर र विभिन्न संघसंस्थाहरुको आर्थिक सहयोगमा हुँदै आएको प्रतियोगितामा यसपटक विजेताले १५ लाख र उपविजेताले १० लाख रुपैयाँसहित ट्रफी, मेडल र प्रमाणपत्र प्राप्त गर्ने छ । प्रतियोगिताको उद्घाटन खेल आयोजक मकवानपुर ११ र नव जनजागृति क्लव सिमराबीच हुनेछ ।
प्रतियोगिता अन्तर्गत सवोत्कृष्ट खेलाडीलाई हेटौंडा स्कूल अफ म्यानेजमेण्ट एण्ड सोसियल साइन्सेसको प्रायोजनम बुलेट मोटरसाइकल प्रदान गरिने भएको छ । यस्तै प्रतियोगितामा विधागत उत्कृष्ट खेलाडी तथा प्रशिक्षकले जनही नगद २५ हजार रुपैयाँसहित ट्रफी प्राप्त गर्नेछन् भने प्रत्येक खेलको म्यान अफ द म्याचले नगद १० हजार रुपैयाँसहित ट्रफी प्राप्त गर्ने अध्यक्ष लामाले बताए ।