स्कटल्यान्डमाथि नेपालको शानदार जित

५ फागुन, हेटौंडा । नेपालले आईसीसी क्रिकेट विश्वकप लिग टु मा शुक्रबार शीर्ष स्थानको स्कटल्याण्ड विरुद्ध ३ विकेटको शानदार जित निकालेको छ ।
नेपालको जितका लागी दीपेन्द्र सिंह ऐरी र कुशल मल्लले उत्कृष्ट ब्याटिङ गरे । उनीहरु दुबैजनाले अर्धशतक प्रहार गरेपछि नेपालले २७५ रनको लक्ष्य ४७ ओभरमा ७ विकेट गुमाएर भेट्टाउन सफल भयो ।
दीपेन्द्रले अविजित ८५ रन बनाउँदा कुशल ८१ रनमा आउट भए । दुवै खेलाडीको ओडिआईमा दोस्रो अर्धशतक हो भने दीपेन्द्रको लिग टु मा यो पहिलो अर्धशतक हो । 
सुरुको पाँच विकेट सस्तैमा गुमाएको नेपालका लागि सोमपाल कामीले अविजित २४ रन बनाउँदा गुल्सन झा १७ रन बनाएर आउट भए । स्कटल्याण्डका लागि क्रिस सोल र मार्क वाटले समान ३÷३ विकेट लिए ।
त्यसअघि पहिले ब्याटिङ गरेको स्कटल्याण्डले ५० ओभरमा ९ विकेट गुमाएर २ सय ७४ रन बनाएको हो । स्कटल्याण्डका लागि माईकल लिस्कले १ सय ७ रनको शतकीय ईनिङ खेले । नेपालका सन्दीप लामिछानेले ३ विकेट लिदा कुशल मल्लले २ तथा सोमपाल कामी, दिपेन्द्र सिंह ऐरी र कुशल भुर्तेलले समान १÷१ विकेट लिए ।
नेपालले दोस्रो पटक ओडिआईमा स्कटल्याण्डलाई हराएको हो । यसअघि गत जुलाईमा स्कटल्याण्डलाई लिग टु मा उसैको मैदानमा पराजित गरेको थियो । सिरिजमा नेपाल २६ खेलमा २२ अंक जोडेर छैटौं स्थानमा रहेको छ ।
स्कटल्याण्ड ३४ खेलमा २३ मा जित र ९ मा हारका साथ ४८ अंकका साथ तीन खेल आगावै विश्वकप लिग टूको च्याम्पियन भईसकेको छ ।