मकवानपुर गोल्डकपको उपाधिका लागी मनाङ र हिमालयन शेर्पा भिड्ने

८ फागुन, हेटौंडा । बागमती प्रदेशको राजधानी हेटौंडामा जारी पाँचौ संस्करणको सहिद स्मृति स्थानीय तह अन्तर्राष्ट्रिय मकवानपुर गोल्डकप फुटबल प्रतियोगिताको उपाधिका लागी हिमालयन शेर्पा र मनाङ मस्र्याङदी क्लब भिड्ने भएका छन् ।
सोमबार भएको अन्तिम सेमीफाइनल खेलमा विदेशी क्लब एभिनियर एफसी क्यामरुनलाई रोक्दै हिमालयनले मनाङसँगको उपाधि भिड्न्त पक्का गरेको हो । क्यामरुनी क्लब एभिनियर हिमालयनसँग १–० गोल अन्तरले रोकिएको हो ।
यसअघि आइतबार भएको पहिलो सेमिफाइनल खेलमा विभागीय टोली सशस्त्र प्रहरीको एपिएफ क्लवलाई हराउँदै मनाङ मस्र्याङ्दी क्लवले फाइनलमा स्थान बनाइसकेको छ ।
हिमालयनको जितका लागी एकमात्र गोल सुनिल श्रेष्ठले गरे । उनले खेलको ५३ औं मिनेटमा गरेको गोल नै निर्णायक बन्यो । अत्यन्तै प्रतिस्पर्धात्मक खेलको पहिलो हाफ गोल रहित बराबरीमा सकिएको थियो । 
खेलको निर्णायक गोलकर्ता सुनिल श्रेष्ठ नै खेलको म्यान अफ द म्याच घोषित भए । उनले नगद १० हजार रुपैयाँसहित ट्रफी प्राप्त गरेका छन् ।
मकवानपुर जिल्ला फुटबल संघको आयोजनामा जारी प्रतियोगिताको फाइनल खेल १० गते बुधबार हुने आयोजकले जानकारी दिएको छ । प्रतियोगिताको विजेताले नगद १५ लाख रुपैयाँ सहित ट्रफि र उपविजेताले नगद १० लाख रुपैया“ सहित ट्रफी प्राप्त गर्नेछन् । 
यस्तै प्रतियोगिताको सर्वोत्कृष्ट खेलाडीलाई बुलेट बाइकको व्यवस्था गरिएको छ भने विधागत उत्कृष्ट खेलाडी तथा प्रशिक्षकले जनही नगद २५ हजार रुपैयाँसहित ट्रफी प्राप्त गर्नेछन् ।