बैंक विरुद्ध हेटौंडामा उद्योग वाणिज्य संघको प्रदर्शन

२२ फागुन, हेटौंडा । बैंक तथा वित्तिय संस्थाको चर्को व्याज र अनावश्यक दवावका कारण प्रताडित हुनुपरेको भन्दै मकवानपुरका उद्योगी व्यवसायीहरुले हेटौंडामा विरोध प्रदर्शन गरेका छन् । मकवानपुर उद्योग वाणिज्य संघको नेतृत्वमा आइतबार दिउँसो हेटौंडामा उद्योगी व्यवसायीले कालो ब्यानरसहित विरोध प्रदर्शन गरेका हुन् । 
चर्को व्याजदरको विरुद्ध सम्बन्धित बैंक तथा वित्तिय संस्थामा ज्ञापनपत्र समेत बुझाइएको छ । उद्योग वाणिज्य संघले विरोध प्रदर्शनमा कालो ब्यानरसहित उपस्थित हुन सार्वजनिक रुपमा आव्हान नै गरेको थियो । हेटौंडाको पल्पसा सभाहलबाट सुरु भएको विरोध प्रदर्शन ¥यालीले हेटौंडा बजार परिक्रमा गरेको थियो । 
बैंक तथा वित्तिय संस्थाको विरुद्धमा मकवानपुर उद्योग वाणिज्य संघले ७ दिने विभिन्न विरोध प्रदर्शन कार्यक्रम तय गरेको छ । विरोध प्रदर्शनको पहिलो दिन कालो व्यानरसहित विरोध प्रदर्शन सहित ज्ञापनपत्र बुझाउने कार्यक्रम भएको छ भने २४ गते हेटौंडाको बुद्धचोकमा बागमती प्रदेश स्तरीय २८ वटा जिल्ला नगर उद्योग वाणिज्य संघहरुको सहभागितामा व्यानर सहितको शान्तिपूर्ण धर्ना दिने कार्यक्रम रहेको मकवानपुर उद्योग वाणिज्य संघका अध्यक्ष कृष्णकुमार गुप्ता अग्रवालले जानकारी दिए । ।
यसैगरी २५ गते बैंकहरुमा १ घण्टा धर्ना, २६ गते बैंकहरुमा २ घण्टा धर्ना, २८ गते बैंकहरुमा डिपोजिट कार्य बन्द गराउने, २९ गते सम्पूर्ण बैंकिङ कारोवार बन्द गराउने र ३० गते शान्तिपूर्ण रुपमा बैंक बन्द गराउने कार्यक्रम रहेको अध्यक्ष अग्रवालले बताए ।