हेटौंडामा अल नेपाल नोभिस बक्सिङको तयारी पूरा

२९ फागुन, हेटौंडा । यहि ३० गते मंगलबारबाट सञ्चालन हुन लागेको अल नेपाल नोभिस बक्सिङ प्रतियोगिताको तयारी पूरा भएको आयोजकले जानकारी दिएको छ । 
आइतबार पत्रकार सम्मेलनको आयोजना गर्दै मकवानपुर जिल्ला बक्सिङ संघका अध्यक्ष तथा कार्यक्रम संयोजक दिपेश जोशीले प्रतियोगिताको तयारी पूरा भएको जानकारी दिएका हुन् । 
प्रतियोगिता यहि फाल्गुन ३० गतेबाट सुरु भई चैत ४ गतेसम्म सञ्चालन हुने संयोजक जोशिले जानकार दिए । मकवानपुर जिल्ला बक्सिङ संघ र बागमती प्रदेश खेलकुद विकास परिषद्को संयुक्त आयोजनामा हुन लागेको प्रतियोगितामा २३ जिल्लाका ३७ वटा क्लवका १७८ जना खेलाडीले सहभागिता जनाउने संयोजक जोशिको भनाई छ  ।
प्रतियोगितामा १५० जना पुरुष र २८ जना महिला रहने छन् । प्रतियोगितामा १७ बर्षदेखि २१ बर्ष उमेरसम्मका खेलाडीले सहभागीता जनाउन पाउँने पनि संयोजक जोशिले बताए । उनले यसअघि कुनैपनि औपचारिक प्रतियोगितामा सहभागिता नजनाएका नयाँ खेलाडीहरुले मात्रै यस प्रतियोगितामा सहभागिता जनाउन पाउने बताए ।
प्रतियोगितामा सहभागी खेलाडीहरुले १६ विधामा प्रतिस्पर्धा गर्ने अध्यक्ष जोशीले बताए । पुरुषतर्फ ९ र महिलातर्फ ७ वटा तौल समूहमा प्रतिस्पर्धा हुनेछ । विधागत प्रथम, द्वितीय र तृतीय हुने खेलाडीले क्रमशः १० हजार, ५ हजार र ३ हजार रुपैयाँसहित ट्रफी प्राप्त गर्नेछन् । 
यस्तै उत्कृष्ट प्रशिक्षक, उत्कृष्ट महिला र पुरुष खेलाडी, उत्कृष्ट टिम, उत्कृष्ट रेफ्री र वेष्ट लुजरलाई नगद ३ हजार रुपैयाँ प्रदान गरिने छ । राम्रो खेल्दा–खेल्दै पनि हारेका एकजना वेष्ट लुजरलाई पुरस्कृत गरिने अध्यक्ष जोशीले बताए । प्रतियोगिता हरेक बर्ष आयोजना गरिने उनले बताए । 
हेटौंडा उपमहानगरपालिका वडा नम्बर ५ का वडाध्यक्ष सुशील घिमिरेले प्रत्येक दिन खेलको म्यान अफ द म्याचलाई ३ हजार रुपैयाँ उपलब्ध गराउने बताए । मकवानपुर जिल्लाबाट प्रतिनिधित्व गर्दै राष्ट्रिय तथा अन्तर्राष्ट्रिय खेलमा प्रतिस्पर्धी भई मेडल प्राप्त गरेका २३ जना खेलाडीलाई सम्मान समेत गरिनेछ ।